मुंबई - राज्यात हिंदुत्वाच्या मुद्द्यावरून राजकारण तापले आहे. मनसे अध्यक्ष राज ठाकरे यांनी औरंगाबाद सभेपूर्वी टीझर लॉन्च करत शिवसेनेला आव्हान दिले होते. त्यानंतर आता, शिवसेनेकडून येत्या १४ तारखेला होणाऱ्या सभेचा टीझर लॉन्च केला आहे. शिवसेनाप्रमुख बाळासाहेब ठाकरे यांच्या जुन्या भाषणांचे व्हिडिओ वापरून 'खऱ्या हिंदुत्वाचा हुंकार, ऐकायला यायलाच पाहिजे,' असे त्यामध्ये म्हटले ( Shivsena Rally Teaser Release ) आहे.
राज्यात राजकीय तापले आहे. मशिदींच्या भोंग्यांवरून सुरू झालेले राजकारण हिंदुत्वाच्या मुद्द्याकडे वळले आहे. शिवसेनेने धर्मनिरपेक्ष पक्षांसोबत युती केली, त्यानंतर सत्तेसाठी लाचार सेनेने हिंदुत्व सोडले, अशी टीका भाजपकडून केली जात आहे. मनसेने त्यात उडी घेत शिवसेनेच्या हिंदुत्वाला आव्हान दिले आहे. या पार्श्वभूमीवर येत्या ५ जून रोजी राज ठाकरे अयोध्येला जाणार आहेत. मात्र, त्याच पूर्वी शिवसेना आणि मनसे असा वाद रंगला आहे. हिंदुत्वाच्या मुद्द्यावर मनसे शिवसेना विशेष करून पक्ष प्रमुख मुख्यमंत्री उद्धव ठाकरे यांना डिवचले आहे. विरोधी पक्ष नेते देवेंद्र फडणवीस यांनी उद्धव ठाकरे यांच्या हिंदुत्वावर जोरदार निशाणा साधला आहे. या घडामोडींना प्रत्युत्तर देण्यासाठी मुख्यमंत्री उद्धव ठाकरे यांची येत्या 14 तारखेला जाहीर सभा होणार आहे. या सभेचा टीझर नुकताच लॉन्च झाला आहे.