मुंबई- हे गोवा नाही हे महाराष्ट्र आहे. काहीही खपवून घेणार नाही. बहुमत नसताना भाजपने सत्तास्थापन करून संसदीय पद्धतीच्या मार्गदर्शक तत्वांचा गैरवापर केला आहे. उद्या सुप्रीम कोर्टाच्या निर्णयाला सामोरं जाण्यासाठी आपण आता तयार असून त्यानंतर होणाऱ्या मतदानावेळी आपण १६२ पेक्षा जास्त आमदारांचा पाठिंबा असलेले बहुमत सादर करून दाखवू, असे विधान राष्ट्रवादीचे अध्यक्ष शरद पवार यांनी केले. महाविकास आघाडीच्या आमदारांनी एकत्र येत हॉटेल ग्रँड हयात येथे जोरदार शक्तीप्रदर्शन केले. यावेळी आमदारांना मार्गदर्शन करताना ते बोलत होते.
अजित पवार यांच्याविषयी बोलताना ते म्हणाले की, त्यांनी पक्षाच्या विरोधात जाऊन भूमिका घेतली. त्यामुळे त्यांच्यावर कारवाई करण्यात आली. ज्या व्यक्तीला पक्षातून काढून टाकले आहे त्याला पक्षाला आदेश देण्याचा कोणताही अधिकार नाही. त्यामुळे अजित पवारांना व्हिप काढण्याचा अधिकारही नसून त्यांचा व्हिप मान्य करण्याची आवश्यकता नाही.