मुंबई - उद्योगपती मुकेश अंबानी यांच्या घराबाहेरील स्फोटके आणि मनसुख हिरेन मृत्यू प्रकरणात मुंबई पोलीस दलाचे माजी अधिकारी सचिन वाझे हे सध्या एनआयएच्या कस्टडीत आहेत. मात्र सचिन वाझेला पाठदुखीचा त्रास आहे, त्या संदर्भात करण्यात आलेली मागणी न्यायालयाने फेटाळून लावली आहे.
सचिन वाझेंच्या वकिलाने बुधवारी कोर्टात सांगितले की, सचिन वाझे आधीपासूनच पाठीच्या दुखण्यापासून ग्रस्त आहे, यामुळे ते खाली बसू शकत नाहीत. त्यांना बसण्यासाठी खुर्ची आणि झोपायला मॅट देण्यात यावा. मात्र यावर ही मागणी फेटाळून लावत न्यायालयाने म्हटले आहे की, जेजे रुग्णालयाच्या अहवालानुसार सचिन वाझे सामान्य आहेत, या कारणास्तव आम्ही परवानगी देऊ शकत नाही. वाझे यांचे वकील म्हणाले की, वाझे यांना दातांची समस्या आहे, त्यावर तरुंगातील रुग्णालयात उपचार घेण्यात यावा, असे न्यायालयाने सांगितले आहे.
सुनील माने यांच्या कोठडीत वाढ
मनसुख हिरेन मृत्यू प्रकरणात मुंबईतील विशेष एनआयए न्यायालयाने सुनील मानेची एनआयए कोठडी 1 मे पर्यंत वाढवली आहे. मनसुख हिरेन खून प्रकरणात मुंबई गुन्हे शाखेचे निरीक्षक सुनील माने यांनी महत्त्वपूर्ण भूमिका बजावली आहे, अशी माहिती एनआयएने न्यायालयात दिली.