പെർത്ത്: ടി20 ലോകകപ്പിലെ സൂപ്പർ 12 പോരാട്ടത്തിൽ ദക്ഷിണാഫ്രിക്കക്കെതിരെ ഇന്ത്യ ആദ്യം ബാറ്റ് ചെയ്യുന്നു. ടോസ് നേടിയ നായകൻ രോഹിത് ശർമ ബാറ്റിങ് തെരഞ്ഞെടുക്കുകയായിരുന്നു. കഴിഞ്ഞ മത്സരങ്ങളിൽ നിന്ന് ഓരോ മാറ്റവുമായാണ് ഇരു ടീമുകളും ഇന്ന് കളത്തിൽ ഇറങ്ങുന്നത്. ഇന്ത്യൻ നിരയിൽ സ്‌പിൻ ഓൾറൗണ്ടർ അക്‌സർ പട്ടേലിന് പകരം ദീപക് ഹൂഡ ടീമിൽ ഇടം നേടിയപ്പോൾ പ്രോട്ടീസിൽ ഷംസിക്ക് പകരം ലുങ്കി എൻഗിഡി ഇടം നേടി
ഇന്നത്തെ മത്സരത്തിൽ വിജയിച്ചാൽ ഇന്ത്യക്ക് സെമി ഉറപ്പിക്കാൻ സാധിക്കും. അതേസമയം ഇന്ത്യൻ നിരയിൽ കെഎൽ രാഹുലിന്‍റെ പ്രകടനത്തിലാകും ഏവരും ഉറ്റ് നോക്കുക. ഓപ്പണർ എന്ന നിലയിൽ ആദ്യ രണ്ട് മത്സരങ്ങളും പൂർണപരാജയമായ രാഹുലിന് ഇന്നത്തെ മത്സരത്തിൽ സ്വന്തം നിലനിൽപ്പിനായും വിമർശകരുടെ വായടപ്പിക്കാനും തകർപ്പൻ ഇന്നിങ്സ് തന്നെ കളിക്കേണ്ടതായിട്ടുണ്ട്.
അതേസമയം പേസിന് അനുകൂലമാണ് പെർത്തിലെ പിച്ച് എന്നാണ് സൂചന. അതിനാൽ തന്നെ ദക്ഷിണാഫ്രിക്കയുടെ തകർപ്പൻ പേസ് നിര ഇന്ത്യൻ ബാറ്റർമാർക്ക് വലിയ വെല്ലുവിളി തന്നെ തീർത്തേക്കാം. എന്നാൽ കഴിഞ്ഞ മത്സരത്തിലേത് പോലെ ബാറ്റിങ്ങിൽ ഇന്ത്യൻ മുന്നേറ്റ നിര ഫോമിലേക്ക് ഉയർന്നാൽ ദക്ഷിണാഫ്രിക്കൻ ബോളർമാരും വെള്ളം കുടിക്കും.