ഓവല്: ലോക ടെസ്റ്റ് ചാമ്പ്യന്ഷിപ്പ് ഫൈനലിന്റെ ഒന്നാം ദിനത്തില് ശക്തമായ നിലയിലാണ് ഓസ്ട്രേലിയ കളിയവസാനിപ്പിച്ചത്. ടോസ് നേടി ആദ്യം ബൗളിങ് തെരഞ്ഞെടുത്ത ക്യാപ്റ്റന് രോഹിത് ശര്മയുടെ തീരുമാനം ശരിവയ്ക്കുന്ന തരത്തില് ഇന്നിങ്സിന്റെ തുടക്കത്തില് പന്തെറിയാന് ഇന്ത്യന് ബൗളര്മാര്ക്ക് സാധിച്ചിരുന്നു. ഓസീസ് നിരയിലെ അപകടകാരിയായ ഉസ്മാന് ഖവാജയെ (0) നാലാം ഓവറില് മുഹമ്മദ് സിറാജ് ആയിരുന്നു പുറത്താക്കിയത്.
പിന്നീട് ഡേവിഡ് വാര്ണറും മാര്നസ് ലബുഷെയ്നും ചേര്ന്നായിരുന്നു ഓസീസ് സ്കോര് ബോര്ഡ് ചലിപ്പിച്ചത്. 22-ാം ഓവര് എറിയാനെത്തിയ ശര്ദുല് താക്കൂര് വാര്ണറിനെ (43) പുറത്താക്കിയാണ് ഈ കൂട്ടുകെട്ട് പൊളിച്ചത്. പിന്നാലെ ലഞ്ചിന് ശേഷം എറിഞ്ഞ ആദ്യ ഓവറിലെ ആദ്യ പന്തില് തന്നെ ലോക ഒന്നാം നമ്പര് ടെസ്റ്റ് ബാറ്റര് മാര്നസ് ലബുഷെയ്നെ (26) മുഹമ്മദ് ഷമിയും പുറത്താക്കി.
എന്നാല്, പിന്നീട് ഇന്ത്യന് ബൗളര്മാരെ കടന്നാക്രമിച്ച് ട്രാവിസ് ഹെഡും (146) മറുവശത്ത് നങ്കൂരമിട്ട് നിന്ന് സ്റ്റീവ് സ്മിത്തും (95) ഓസ്ട്രേലിയന് സ്കോര് ഉയര്ത്തി. നാലാം വിക്കറ്റില് ഇരുവരും ചേര്ന്ന് ഇതുവരെ 251 റണ്സാണ് നേടിയത്. രണ്ടാം ദിനത്തിലും ഇവര് ഇന്ത്യന് ബൗളര്മാര്ക്ക് വെല്ലുവിളിയാകാനാണ് സാധ്യത.
ഓസീസ് ബാറ്റര്മാര് അനായാസം റണ്സ് കണ്ടെത്തുന്ന സാഹചര്യത്തില് ലോക ഒന്നാം നമ്പര് ടെസ്റ്റ് ബൗളറായ രവിചന്ദ്ര അശ്വിനെ ഇന്ത്യന് പ്ലെയിങ് ഇലവനിലേക്ക് ഉള്പ്പെടുത്താതിരുന്നതില് സൗരവ് ഗാംഗുലി ഉള്പ്പടെ നിരവധി പേരാണ് ചോദ്യങ്ങള് ഉന്നയിച്ചത്. മത്സരത്തിന്റെ ഒന്നാം ദിനം അവസാനിച്ചതിന് പിന്നാലെ ഇതില് വിശദീകരണവുമായി ഇന്ത്യന് ടീം ബൗളിങ് പരിശീലകന് പരസ് മാംബ്രെ തന്നെ രംഗത്തെത്തിയിരുന്നു. നാല് പേസര്മാരെ ടീമില് ഉള്പ്പെടുത്തിയതിന്റെ കാരണം വ്യക്തമാക്കിക്കൊണ്ടായിരുന്നു അദ്ദേഹത്തിന്റെ പ്രതികരണം.