ഹൈദരാബാദ്:തെലങ്കാനയിലെ സി.ആർ ഫൗണ്ടേഷന്‍റെ സേവനങ്ങളെ പ്രകീര്‍ത്തിച്ച് കേരള കൃഷി മന്ത്രി പി പ്രസാദ്. സാധരണക്കാര്‍ക്ക് സഹായം നല്‍കേണ്ട സമയമാണിത്. സഹായ പ്രവര്‍ത്തനങ്ങള്‍ ഏറ്റെടുക്കുന്നത് സാധാരണക്കാര്‍ക്ക് ആശ്വാസമാണ്. ഹൈദരാബാദിലെ സിആർ ഫൗണ്ടേഷൻ സന്ദർശിച്ച ശേഷമാണ് മന്ത്രിയുടെ പ്രതികരണം.
മനുഷ്യ ബന്ധത്തിന്‍റെയും മനുഷ്യത്വത്തിന്‍റെയും വ്യക്തമായ ഉദാഹരണമാണ് സി.ആര്‍ ഫൗണ്ടേഷനെന്ന് പറഞ്ഞ പി പ്രസാദ്, വയോജനങ്ങള്‍ക്കും സ്‌ത്രീകള്‍ക്കും വേണ്ടിയുള്ള ഭവനങ്ങള്‍, സാധാരണക്കാര്‍ക്കുള്ള സഹായങ്ങള്‍ തുടങ്ങിയ പ്രവര്‍ത്തനങ്ങള്‍ അറിയാന്‍ സാധിച്ചതായും മനുഷ്യത്വം നഷ്‌ടമാകുന്ന കാലത്ത് ഈ പ്രവര്‍ത്തനങ്ങള്‍ വളരെ നല്ല അനുഭവമാണ് നല്‍കിയതെന്നും പറഞ്ഞു. തെലങ്കാനയില്‍ നിന്നുള്ള സി.പി.ഐയുടെ പ്രമുഖ നേതാവും ദേശീയ ജനറല്‍ സെക്രട്ടറിയുമായിരുന്ന ചന്ദ്ര രാജേശ്വര റാവുവിന്‍റെ പേരിലുള്ളതാണ് ഫൗണ്ടേഷന്‍.