ന്യൂഡൽഹി : 77-ാം സ്വാതന്ത്ര്യ ദിനാശംസകൾ നേർന്ന് ക്രിക്കറ്റ് ലോകം. തങ്ങളുടെ സോഷ്യൽ മീഡിയ അക്കൗണ്ടുകളിലൂടെയാണ് താരങ്ങൾ ആശംസകൾ നേർന്നത്. വിരാട് കോലി, യുവരാജ് സിങ്, രവീന്ദ്ര ജഡേജ, ഹർഭജൻ സിങ്, അനിൽ കുംബ്ലെ, സുരേഷ് റെയ്‌ന, സൂര്യകുമാർ യാദവ് തുടങ്ങിയ താരങ്ങൾ ആശംസകൾ അറിയിച്ചു. കൂടാതെ ബിസിസിഐയും, ബിസിസിഐ സെക്രട്ടറി ജയ് ഷായും ട്വിറ്റർ എന്ന് അറിയപ്പെട്ടിരുന്ന എക്‌സിലൂടെ ആശംസകൾ അറിയിച്ചിട്ടുണ്ട്.
'ഏവർക്കും സ്വാതന്ത്ര്യ ദിനാശംസകൾ നേരുന്നു' എന്നാണ് ഇന്ത്യൻ മുൻ നായകൻ വിരാട് കോലി എക്‌സിൽ കുറിച്ചത്. 'മറ്റാരുമായും താരതമ്യപ്പെടുത്താനാവാത്ത ബഹുമതിയുള്ള രാഷ്‌ട്രം. ഏവർക്കും സ്വാതന്ത്ര്യദിനാശംസകൾ നേരുന്നു! നമ്മുടെ രാജ്യത്തിന്‍റെ ഉയർച്ചയും തിളക്കവും തുടരട്ടെ, അതിന്‍റെ മഹത്വത്തിലേക്ക് തുടർന്നും സംഭാവന ചെയ്യാൻ നമുക്ക് പരമാവധി ശ്രമിക്കാം!' എന്നായിരുന്നു സൂര്യകുമാർ യാദവ് ട്വീറ്റ് ചെയ്‌തത്.
'എല്ലാവർക്കും സ്വാതന്ത്ര്യദിനാശംസകൾ നേരുന്നു! ഇന്ന് നമ്മൾ സ്വാതന്ത്ര്യവും വൈവിധ്യവും ആഘോഷിക്കുന്നു. നമ്മുടെ രാഷ്‌ട്രത്തിന്‍റെ പുരോഗതിക്കായും, നമ്മുടെ രാജ്യത്തിന് ശോഭനവും സമൃദ്ധവുമായ ഭാവി കെട്ടിപ്പടുക്കാനും ത്രിവർണ്ണ പതാക ഉയർത്തിപ്പിടിക്കാനും നമുക്ക് പ്രയത്‌നിക്കാം.! ഇന്ത്യൻ ക്രിക്കറ്റ് കൺട്രോൾ ബോർഡ് (ബിസിസിഐ) സെക്രട്ടറി ജയ് ഷാ എക്‌സിൽ കുറിച്ചു.
'ഓരോ ഇന്ത്യക്കാരനും 77-ാം സ്വാതന്ത്ര്യദിനാശംസകൾ നേരുന്നു. ജയ് ഹിന്ദ് എന്നാണ് ബിസിസിഐ ട്വീറ്റ് ചെയ്‌തത്'. 'എല്ലാവർക്കും സ്വാതന്ത്ര്യ ദിനാശംസകൾ നേരുന്നു!' എന്ന് ഇതിഹാസ ഇന്ത്യൻ സ്‌പിന്നർ അനിൽ കുംബ്ലെ ട്വീറ്റ് ചെയ്‌തപ്പോൾ, 'ജയ് ഹോ, സ്വാതന്ത്ര്യദിനം' എന്നാണ് ഇന്ത്യൻ സ്റ്റാർ ഓൾറൗണ്ടർ രവീന്ദ്ര ജഡേജ കുറിച്ചത്.