'777 ಚಾರ್ಲಿ' ನೋಡಲು ಬಂದ 'ಡಯಾನ'ಗೆ ಪ್ರವೇಶ ನಿರಾಕರಿಸಿದ ಥಿಯೇಟರ್ ಸಿಬ್ಬಂದಿ

ಶ್ವಾನದೊಂದಿಗೆ '777 ಚಾರ್ಲಿ' ಸಿನಿಮಾ ನೋಡಲು ಬಂದ ವ್ಯಕ್ತಿಗೆ ಥಿಯೇಟರ್ ಒಳಗೆ ಬಿಡದಿದ್ದಕ್ಕೆ ಚಿತ್ರಮಂದಿರದ ಬಳಿ ಪ್ರತಿಭಟನೆ ನಡೆಸಿದ್ದಾರೆ. ದಾವಣಗೆರೆಯ ಗೀತಾಂಜಲಿ ಥಿಯೇಟರ್​ನಲ್ಲಿ ಘಟನೆ ನಡೆದಿದೆ.

ದಾವಣಗೆರೆ:ಸಾಕುನಾಯಿಯೊಂದಿಗೆ '777 ಚಾರ್ಲಿ' ಸಿನಿಮಾ ನೋಡಲು ಬಂದವನಿಗೆ ಥಿಯೇಟರ್ ಸಿಬ್ಬಂದಿ ನಿರಾಸೆ ಮೂಡಿಸಿದ್ದಾರೆ. ಶ್ವಾನವನ್ನು ಥಿಯೇಟರ್ ಒಳಗೆ ಬಿಡದ ಸಿಬ್ಬಂದಿ ವಿರುದ್ಧ ನಾಯಿಯ ಮಾಲೀಕ ಆಕ್ರೋಶ ವ್ಯಕ್ತಪಡಿಸಿರುವ ಘಟನೆ ನಗರದಲ್ಲಿ ನಡೆದಿದೆ. ನಗರದ ಗೀತಾಂಜಲಿ ಥಿಯೇಟರ್​ನಲ್ಲಿ ಭಾನುವಾರ ಘಟನೆ ನಡೆದಿದೆ.

ತನ್ನ ನೆಚ್ಚಿನ ಶ್ವಾನವನ್ನು ಒಳಗೆ ಬಿಡದಿದ್ದಕ್ಕೆ ಥಿಯೇಟರ್ ಮುಂದೆ ನಾಯಿ ಡಯಾನ ಜೊತೆ ನಗರದ ಕೆಟಿ ಜಂಬಣ್ಣ ನಗರದ ನಿವಾಸಿ ಕೆಂಚ ಎಂಬುವರು ಪ್ರತಿಭಟನೆ ನಡೆಸಿದ್ದಾರೆ. ಚಿತ್ರ ನೋಡಲು ಮುದ್ದು ಶ್ವಾನದೊಂದಿಗೆ ಬಂದಿದ್ದ ಕೆಂಚ ಶನಿವಾರವೇ ತನ್ನ ಶ್ವಾನ, ತನ್ನ ಸಹೋದರನಿಗೆ ಸೇರಿ ಒಟ್ಟು 3 ಟಿಕೆಟ್ ಬುಕ್ ಮಾಡಿದ್ದರು.

ಚಾರ್ಲಿ ಪೆಟ್ ಲವರ್ಸ್ ಆಧಾರಿತ ಸಿನಿಮಾ ಆಗಿದ್ದರಿಂದ ತನ್ನ ಶ್ವಾನಕ್ಕೆ ಚಿತ್ರ ತೋರಿಸಲು ಆಗಮಿಸಿದ್ದರು. ಇದಲ್ಲದೆ ಸಿನಿಮಾದ ನಂತರ ಇತರೆ ಪ್ರೇಕ್ಷಕರಿಗೆ ಸಿಹಿ ಹಂಚಿ ತನ್ನ ನಾಯಿ 'ಡಯಾನ 777' ಎಂದು ಹೆಸರಿಡಲು ಯೋಜಿಸಿದ್ದರು.‌

ಆದರೆ, ಇದಕ್ಕೆ ಥಿಯೇಟರ್ ಸಿಬ್ಬಂದಿ ನಿರಾಕರಿಸಿದ ಬೆನ್ನಲ್ಲೇ ಶ್ವಾನದ ಮಾಲೀಕ ಕೆಂಚ ಅವರು ಜಿಲ್ಲಾಧಿಕಾರಿ ಪರವಾನಿಗೆ ಪಡೆದು ಸಿನಿಮಾ ತೋರಿಸಿ ಎಂದು ಪಟ್ಟು ಹಿಡಿದಿದ್ದರು. ಅದರೂ ಕೂಡ ಥಿಯೇಟರ್ ಸಿಬ್ಬಂದಿ ನಾಯಿಯನ್ನು ಒಳಗಡೆ ಬಿಡದಿದ್ದಕ್ಕೆ ಕೆಂಚ ನಿರಾಸೆಯಿಂದ ಮನೆಗೆ ವಾಪಸ್ ಆಗಿದ್ದಾರೆ‌.