પાટણ: શહેરના બગવાડા દરવાજા (Bagwada Darwaja Patan) ખાતે કોરોના ટેસ્ટિંગ સેન્ટર (Corona Testing Center Patan) અને જનતા ક્લિનિક પાસે જ બાયોમેડિકલ વેસ્ટ (Biomedical Waste In Patan) છૂટોછવાયો જમીન પર પડેલો મળી આવતા આરોગ્ય કર્મચારીઓની ઘોર બેદરકારી છતી થઈ છે. રસ્તામાં બાયોમેડિકલ વેસ્ટ જોઈ શહેરીજનો ચોંકી ઊઠ્યા હતા અને આવા બેજવાબદાર કર્મચારીઓ સામે પગલાં ભરવા માંગ કરી હતી.
જમીન ઉપર છૂટો-છવાયેલો જોવા મળ્યો મેડિકલ વેસ્ટ
પાટણ શહેરના હાર્દ સમાન બગવાડા દરવાજા ખાતે નગરપાલિકાની વોર્ડ કચેરી (Municipal ward office Patan) પાસે જિલ્લા આરોગ્યતંત્ર દ્વારા કોરોના ટેસ્ટિંગ સેન્ટર અને જનતા ક્લિનિક (Janta Clinic Patan) ઊભું કરવામાં આવ્યું છે, જ્યાં બહારગામથી આવતા અને શહેરીજનોને દવા સાથે કોરોનાનું ટેસ્ટિંગ તથા રસીકરણ કરવામાં આવે છે. સોમવારે સવારે આ સ્થળેથી મેડિકલ વેસ્ટની સાધન-સામગ્રી જમીન ઉપર છૂટી-છવાયેલી પડેલી જોવા મળી આવી હતી, જે જોઈ અહીંયા સારવાર (Corona Treatment Patan) અર્થે આવતા દર્દીઓ અને શહેરીજનો ચોંકી ઊઠ્યા હતા. ફરજ પરના આરોગ્ય કર્મચારીઓની આ બેદરકારી ટીકા પાત્ર બની હતી.