তেজপুৰ, ৫ মাৰ্চ: ২৭ মাৰ্চত অনুষ্ঠিত হ'ব অসম বিধানসভাৰ প্ৰথম পৰ্যায়ৰ নিৰ্বাচন ৷ এই নিৰ্বাচনত প্ৰাৰ্থীত্ব প্ৰদানক লৈ কংগ্ৰেছৰ ভিতৰচ’ৰাত চলিছে সংঘাত । অসম প্ৰদেশ কংগ্ৰেছৰ তৰফৰ পৰা তেজপুৰ বিধানসভা সমষ্টিৰ প্ৰাৰ্থীত্বৰ তালিকাত তেজপুৰৰ বাম পৰ্বতীয়াৰ নিবাসী জিতেন শইকীয়াক কংগ্ৰেছ দলৰ পৰা সাম্ভাব্য প্ৰাৰ্থীত্ব পোৱাৰ প্ৰতিবাদত তেজপুৰৰ ভিন্ন স্থানৰ লগতে শোণিতপুৰ জাৰ্নেলিষ্ট ইউনিয়নৰ কাৰ্যালয়ৰ বেৰত জিতেন শইকীয়া বিৰোধী পোষ্টাৰ আৰিলে কংগ্ৰেছ কৰ্মীসকলে ।
উক্ত পোষ্টাৰসমূহত 'জিলা পৰিসদ নিৰ্বাচনত বেয়াকৈ পৰাজিত হোৱা জিতেন শইকীয়াই তেজপুৰত কেতিয়াও এম এল এ হ'ব নোৱাৰে', 'ছালফা জিতেন শইকীয়াক ৰিপুন বৰাই টকাৰ বিনিময়ত টিকট দিব বিচাৰিছে' বুলি উল্লেখ আছে । আনহাতে, ৰিপুন বৰাৰ বিৰুদ্ধেও এইদৰে পোষ্টাৰ আৰে ।