সৌন্দৰ্য বিশেষজ্ঞ মালা মহন্ত গুৱাহাটী, ৩০ নৱেম্বৰ: শীতৰ এই সময়চোৱাত বিভিন্ন ধৰণৰ সমস্যাই দেখা দিয়ে । তাৰে ভিতৰৰ এটা সমস্যা হৈছে এই সময়চোৱাত কেতিয়াবা ছালখন টানি টানি ধৰা যেন অনুভৱ হয় । জলবায়ুত আৰ্দ্ৰতা কম থকাৰ বাবে আৰু বতাহৰ বাবে ছালখন শুকান হৈ যায় । বিশেষকৈ যিসকলৰ ছাল শুকান তেওঁলোকৰ এই সময়চোৱাত বহু সমস্যাই দেখা দিয়ে ।
শীতৰ এই সময়চোৱাত কিদৰে আপোনাৰ ছালখন নিমজ আৰু উজ্জ্বল কৰি ৰাখিব এই বিষয়ে জনালে সৌন্দৰ্য বিশেষজ্ঞ মালা মহন্তই ৷ মহন্তই শীতৰ এই সময়চোৱাত ছালৰ আৰ্দ্ৰতা কমি অহাৰ ফলত ছালখন অনুজ্জ্বল আৰু শেঁতা পৰাৰ ফলত সৌন্দৰ্য হানি হোৱা কথা ব্যক্ত কৰে ৷ তেওঁ লগতে এই সমস্য়াৰ পৰা হাত সাৰিবলৈ এক ঘৰুৱা উপকৰণৰ বিষয়ে উল্লেখ কৰে ৷ এই পদ্ধতিৰে ছালখন নিমজ আৰু উজ্জ্বল কৰি ৰাখিব পৰাৰ কথা উল্লেখ কৰে সৌন্দৰ্য বিশেষজ্ঞগৰাকীয়ে ৷
সৌন্দৰ্য বিশেষজ্ঞ মালা মহন্তই উল্লেখ কৰা এই উপকৰণৰ বাবে লাগিব চাৰি চামুচ কমলাৰ ৰস, দুচামুচ গাখীৰৰ শৰ আৰু এচামুচ মৌ । এই গোটেইখিনি সামগ্ৰী প্ৰথমে ভালদৰে মিহলাই এটা মিশ্ৰণ তৈয়াৰ কৰি ল’ব লাগিব । তাৰ পিছত এই মিশ্ৰণটো ভালদৰে কপাহেৰে মুখ আৰু ডিঙিৰ ছালত লগাব । এনেদৰে ১৫ মিনিট সময় ৰাখি ভালদৰে মুখখন ধুই দিব । এনেদৰে সপ্তাহত দুবাৰকৈ ব্যৱহাৰৰ কৰিলে ছালৰ শুকান ভাৱটো নোহোৱা হ'ব ।
শীতকালৰ এই সময়চোৱাত বজাৰত কমলা যথেষ্ট পৰিমাণে উপলব্ধ হয় । কমলাত 'ভিটামিন চি' থাকে সেয়ে এই সময়চোৱাত প্ৰত্যেকেই দুগিলাচকৈ কমলাৰ ৰস খাব লাগে । ইফালে গাখীৰৰ শৰত ছালখন শুকানভাৱ নাইকীয়া কৰাৰ গুণ থাকে আৰু মৌয়ে ছালখন আৰ্দ্ৰতা পূৰণ কৰাৰ লগতে ছালৰ উজ্জ্বলতাও বৃদ্ধি কৰে । বহু সময়ত বিভিন্ন কাৰণত ছালৰ চানবাৰ্ণ হোৱাও দেখা যায় । এই মিশ্ৰণটো ব্যৱহাৰ কৰাৰ ফলত ছালৰ চানবাৰ্ণৰ সমস্যাও নোহোৱা হ'ব ।
লগতে পঢ়ক:এই ৫টা কাৰণত শীতকালত খাদ্যৰ তালিকাত অন্তৰ্ভুক্ত কৰক আমলখি
