গুৱাহাটী, 17 ফেব্ৰুৱাৰী : ৰাজ্যৰ ভিন্ন প্ৰান্তত বৰ্তমানেও অব্যাহত আছে নিচাজাতীয় দ্ৰব্যৰ সৰবৰাহ ৷ ৰাজ্যত নিচাজাতীয় দ্ৰব্যৰ সৰবৰাহ আৰু প্ৰচলন বন্ধ কৰিবলৈ অসম আৰক্ষীয়ে ধাৰাবাহিক ভাবে অভিযান চলাইছে যদিও ৰাজ্যৰ বিভিন্ন প্ৰান্তত আজিও আৰক্ষীৰ চকুত ধূলি দি গোপনে একাংশই চলাই গৈছে ড্ৰাগছৰ বিক্ৰী আৰু সৰবৰাহ (Anti drugs mission in Assam)।
নিষিদ্ধ ড্ৰাগছৰ বিৰুদ্ধে চলোৱা এই অভিযান ৰাজ্যৰ বিভিন্ন প্ৰান্তৰ সমান্তৰালভাৱে অব্যাহত আছে গুৱাহাটী মহানগৰীতো ।এই অভিযানৰ অংশ স্বৰূপে বুধবাৰৰ নিশা সাতগাঁও থানাৰ আৰক্ষীৰ এটা দলে মহানগৰীৰ পাঞ্জাবাৰীত চলায় অভিযান (Guwahati Police Anti-Drug Operation) ৷ নৱজ্যোতি নগৰৰ চান কুমাৰ দাসৰ বাসগৃহত সাতগাঁও থানাৰ আৰক্ষীৰ এটা দলে অভিযান চলায় ৷ অভিযানকালত বুজন পৰিমাণৰ হেৰ’ইন জব্দ কৰিবলৈ সক্ষম হোৱাৰ লগতে দুজনকৈ ড্ৰাগছ সৰবৰাহকাৰীক গ্ৰেপ্তাৰ কৰিবলৈ সক্ষম হয় সাতগাঁও আৰক্ষী ৷ ইয়াৰে এগৰাকী মহিলা বুলি আৰক্ষী সূত্ৰত প্ৰকাশ ।
অৱশ্যে আৰক্ষী অহাৰ উমান পাই ঘটনাস্থলীৰ পৰা পলায়ন কৰে ড্ৰাগছ ব্যৱসায়ী চান কুমাৰ দাসে । আৰক্ষীয়ে গ্ৰেপ্তাৰ কৰা ধৃত সৰবৰাহকাৰী কেইটা হৈছে পাঞ্জাবাৰী নৱজ্যোতি নগৰৰ মামণি দাস ওৰফে মৰমী দাস (৩৪) আৰু মণিপুৰৰ মনিৰুল হুছেইন ওৰফে চাদ্দাম হুছেইন (২৫) ৷ আৰক্ষীয়ে ধৃত সৰবৰাহকাৰী কেইটাৰ পৰা ১৫ টা হেৰ’ইনৰ পেকেট আৰু ১৭০ গ্ৰাম নিষিদ্ধ হে'ৰইন জব্দ কৰে । মন কৰিবলগীয়া যে ,ড্ৰাগছ ব্যৱসায়ী মামণি দাস আৰু চান কুমাৰ দাস সম্পৰ্কত স্বামী স্ত্ৰী (Husband wife running heroin business in Guwahati) ।