নেশ্যনেল ডেস্ক,১৩ জানুৱাৰী :শেহতীয়াকৈ দেশত কয়লা চিণ্ডিকেটৰ বিৰুদ্ধে কঠোৰ হৈছে কেন্দ্ৰীয় অনুসন্ধান সংস্থা চিবিআই । বিগত বছৰৰ ২৮ নৱেম্বৰত চিবিআইৰ দুৰ্নীতি নিবাৰক শাখাই পশ্চিমবংগ, বিহাৰ, ঝাৰখণ্ড আৰু উত্তৰ প্ৰদেশৰ প্ৰায় ৪৫ টা স্থানত কয়লা চিণ্ডিকেট সন্দৰ্ভত বৃহৎ অভিযান চলাইছিল । এইবাৰ পশ্চিমবংগত চেন্ট্ৰেল ব্য়ুৰো অব ইনভেষ্টিগেচন (চিবিআই)ৰ দলৰ এক বৃহৎ অভিযান । কয়লাৰ চোৰাং বেহাৰ বিৰুদ্ধে ৰাজ্য়খনৰ ১০ টাকৈ স্থানত চিবিআইয়ে চলালে এই অভিযান ।
ইষ্টাৰ্ণ ক'লফিল্ড লিমিটেড (ইচিএল)ত কয়লাৰ অবৈধ খনন আৰু চোৰাং কাৰ্যৰ বিৰুদ্ধে পশ্চিমবংগৰ আসনসোল, দূৰ্গাপুৰ আৰু ৰাণীগঞ্জৰ ১০ টাকৈ স্থানত বুধবাৰে অভিযান চলাই চিবিআইয়ে । সূত্ৰৰ মতে, কয়লা মাফিয়া অনুপ মাঝি ওৰফে লালা আৰু তেওঁৰ আত্মীয়ৰ ঘৰত চলা এই অভিযানৰ দলটোত আছিল প্ৰায় ৭৫ গৰাকী চিবিআইৰ বিষয়া ।