নেশ্যনেল ডেস্ক, ১৬ অক্টোবৰ : কৰ্ণাটকৰ উপভোক্তা আয়োগৰ গুৰুত্বপূৰ্ণ ৰায়(Consumer court of Karnataka) । গ্ৰাহকক ৫০০ টকা ঘূৰাব নোৱাৰাৰ বাবেই ইণ্ডিয়ান অভাৰচিজ বেংক(Indian Overseas Bank)ক বিহিলে ১.০২ লাখ টকাৰ জৰিমনা । ২৮ নৱেম্বৰ ২০২০ ত এগৰাকী অধিবক্তাৰ একাউন্টৰ পৰা কৰ্তন কৰিছিল অতিৰিক্ত ৫০০ । সময়ত ৫০০ টকা ঘূৰাই নিদিয়াৰ বাবেই ১,০২,৭০০ টকা জৰিমনা পৰিশোধ কৰিবলৈ নিৰ্দেশ দিয়ে আয়োগে(Indian Overseas Bank to pay a fine) ।
জানিব পৰা মতে ২৮ নৱেম্বৰ ২০২০ত ধাৰৱাডৰ অধিবক্তা সিদ্ধেশ হেবলীয়ে এটা ATM ৰ ৫০০ টকা উলিওৱাৰ চেষ্টা কৰিছিল । কিন্তু তেঁওৰ সঞ্চয় একাউন্টৰ পৰা ৫০০ টকা ডেবিট হোৱাৰ পাছতো ATM ৰ ৫০০ টকা ওলোৱা নাছিলে । তাৰ পিছত তেওঁ ওচৰৰ আন এটা ATM ৰ পৰা ৫০০ টকা উলিয়াবলৈ সক্ষম হৈছিল ।
কিন্তু পৰৱৰ্তী সময়ত প্ৰথম লেনদেনটো তেঁওৰ একাউন্টলৈ ঘূৰাই দিয়া নাছিল । যাৰ বাবে ২০২০ চনৰ ২ ডিচেম্বৰত তেঁও ইণ্ডিয়ান অভাৰচিজ বেংকৰ শাখা পৰিচালকৰ ওচৰত এই সন্দৰ্ভত এক অভিযোগ দাখিল কৰিছিল । কিন্তু শাখা প্ৰৱন্ধকে হেবলীৰ অভিযোগৰ ক্ষেত্ৰত কোনো ব্যৱস্থা গ্ৰহণ কৰা নাছিল । যাৰ পৰিপ্ৰেক্ষিতত তেওঁ ধাৰৱাডৰ জিলা উপভোক্তা আয়োগৰ ওচৰত বেংকৰ বিৰুদ্ধে ব্যৱস্থা লোৱাৰ দাবীত এক অভিযোগ দাখিল কৰে ।
সেই অভিযোগৰ ভিত্তিত আয়োগৰ অধ্যক্ষ আশাপ্পা ভুতে আৰু সদস্য ভিএ বোলাশেট্টি আৰু পিচি হীৰেমাথে তদন্ত কৰি হেবলীৰ অভিযোগৰ সত্যসত্যতা নিৰূপন কৰে । আয়োগে উল্লেখ কৰে যে যদি গ্ৰাহকৰ একাউন্টৰ পৰা ধন কৰ্তনৰ পাছত ATM ধন দিয়াত বিফল হয় তেন্তে ৬ দিনৰ ভিতৰত কৰ্তন কৰা ধন একাউন্টত জমা কৰিব লাগে । ৬ দিনতকৈ অধিক পলম হ'লে বেংকে প্ৰতিদিনৰ বাবদ ১০০ টকাৰ ক্ষতিপূৰণ দিব লাগে ।