নিউজ ডেস্ক, 12 ফেব্ৰুৱাৰী: দেওবাৰে আইচিচিৰ ১৯ বছৰ অনূৰ্ধ্ব পুৰুষ ক্ৰিকেট বিশ্বকাপৰ ফাইনেলত অষ্ট্ৰেলিয়াৰ বিৰুদ্ধে ভাৰতৰ শোচনীয় পৰাজয়ৰ পিছতে ভাৰতক উপহাস কৰা বুলি পাকিস্তানী ক্ৰিকেট অনুৰাগীক তীব্ৰ সমালোচনা কৰে ভাৰতৰ প্ৰাক্তন ক্ৰিকেটাৰ ইৰফান পাঠানে ।
ভাৰতীয় ক্ৰিকেটাৰে বিশ্বকাপ জয় কৰিব নোৱৰাৰ বাবে উপহাস কৰা পাকিস্তানী অনুৰাগীৰ মন্তব্যত প্ৰতিক্ৰিয়া প্ৰকাশ কৰে বাওঁহতীয়া পেচাৰগৰাকীয়ে ৷ পাকিস্তানে ফাইনেলৰ বাবে যোগ্যতা অৰ্জন নকৰাৰ পিছতো ফাইনেলত ভাৰতৰ পৰাজয় উদযাপন কৰা পাকিস্তানীসকলক কীব’ৰ্ড যোদ্ধা বুলি উল্লেখ কৰে পাঠানে ।
Xত এটা পোষ্টত পাঠানে লিখিছে, “তেওঁলোকৰ ১৯ বছৰ অনূৰ্ধ্ব ক্ৰিকেট দলটোৱে ফাইনেলত প্ৰৱেশ কৰিব নোৱৰাৰ পিচতো সীমান্তৰ সিপাৰৰ কীব’ৰ্ড যোদ্ধাসকলে আমাৰ যুৱকসকলৰ পৰাজয়ত আনন্দ লাভ কৰে ।”
৩৯ বছৰীয়া পাঠানে লগতে দৃঢ়তাৰে কয় যে এনে নেতিবাচক মনোভাৱে তেওঁলোকৰ দেশৰ দৃষ্টিভংগীত বেয়াকৈ প্ৰভাৱ পেলাইছে । ক্ৰিকেটাৰগৰাকীয়ে লগতে কয় যে এই নেতিবাচক মনোভাৱে তেওঁলোকৰ দেশৰ মানসিকতাক বেয়াকৈ প্ৰতিফলিত কৰে । ইংলেণ্ডৰ অ’ভালত অনুষ্ঠিত বিশ্ব টেষ্ট চেম্পিয়নশ্বিপৰ ফাইনেলৰ পাছত আইচিচিৰ ফাইনেলত অষ্ট্ৰেলিয়াৰ বিৰুদ্ধে তৃতীয়বাৰৰ বাবে পৰাস্ত হোৱাৰ পাছত বহু পাকিস্তানী অনুৰাগীয়ে ভাৰতক উপহাস কৰিবলৈ আৰম্ভ কৰাৰ পাছতেই পাঠানে এই প্ৰতিক্ৰিয়া প্ৰকাশ কৰে ।
ইয়াৰ পূৰ্বে ইৰফান পাঠানে আনকি ৰছিদ খানৰ সৈতেও নিজৰ ছবি শ্বেয়াৰ কৰিছিল ৷ হাছমাতুল্লাহ সাহিদী নেতৃত্বাধীন দলটোৱে আইচিচিৰ পুৰুষৰ এদিনীয়া ক্ৰিকেট বিশ্বকাপ ২০২৩ত পাকিস্তানক পৰাস্ত কৰাৰ পিছত ৰছিদৰ সৈতে নৃত্য কৰা দেখা গৈছিল পাঠানক । ইণ্ডিয়ান প্ৰিমিয়াৰ লীগত (IPL) পঞ্জাব কিংছকো প্ৰতিনিধিত্ব কৰা পাঠানে ৫০ অভাৰৰ প্ৰতিযোগিতাৰ সময়ত আফগানিস্তান ক্ৰিকেট দলকো নিজৰ ঘৰলৈ আমন্ত্ৰণ জনাইছিল ।
১৯ বছৰ অনূৰ্ধ্ব ক্ৰিকেট বিশ্বকাপৰ ফাইনেলত আধিপত্য বিস্তাৰ কৰি অষ্ট্ৰেলিয়া দলটোৱে ভাৰতৰ বিৰুদ্ধে ৭৯ ৰানত জয়লাভ কৰি চতুৰ্থটো খিতাপ দখল কৰে ।
লগতে পঢ়ক:19 বছৰ অনূৰ্ধ্ব বিশ্বকাপত চেম্পিয়নৰ খিতাপ দখল অষ্ট্ৰেলিয়াৰ
