চিৰাং, 12 এপ্ৰিল: শুকুৰবাৰে চিৰাঙত অনুষ্ঠিত হ’ল ইউপিপিএল দলৰ যোগদান কাৰ্যসূচী ৷ বিপিএফ এৰি ইউপিপিএলত যোগদান কৰিলে প্ৰাক্তন মন্ত্ৰী চন্দন ব্ৰহ্মই । চন্দন ব্ৰহ্মৰ লগত আমছু-বনছুৰ দুই শীৰ্ষ নেতা আৰু অন্যান্য ছাত্ৰ সংগঠনৰ নেতাসহ প্ৰায় পাঁচ শতাধিক লোকে আনুষ্ঠানিকভাৱে ইউপিপিএলত যোগদান কৰে ।
উল্লেখযোগ্য যে বিগত বিধানসভা নিৰ্বাচনত চিদলী বিধানসভা সমষ্টিত শোচনীয় পৰাজয়ৰ পিচৰ পৰাই ৩ টা বছৰ ৰাজনীতিৰ পৰা আঁতৰত আছিল প্ৰাক্তন মন্ত্ৰী চন্দন ব্ৰহ্ম । চিৰাং জিলাৰ সদৰ কাজলগাঁৱত চন্দন ব্ৰহ্মৰ সৈতে আমছুৰ মুখ্য সাংগঠনিক সম্পাদক গুলজাৰ হুছেইন প্ৰামাণিক, বনছুৰ উপ-সভাপতি অশোক ব্ৰহ্ম, আক্ৰাছুৰ মুখ্য উপদেষ্টা অৰুণ কুমাৰ ৰায় আৰু সহ সম্পাদক ৰাজু কুমাৰ ৰায়ে জাতীয় সংগঠনৰ পৰা অব্যাহতি লৈ ইউপিপিএল দলত আজি আনুষ্ঠানিকভাৱে যোগদান কৰে ।
যোগদানৰ পিচতে চন্দন ব্ৰহ্মই কয়, ‘‘সময়ৰ আহ্বানত মই আজি বিপিএফ দল এৰি ইউপিপিএলত যোগদান কৰিলো । ইয়াত মই কাকো সমালোচনা কৰিব নিবিচাৰো ।’’ উন্নয়নৰ স্বাৰ্থতে দল এৰা বুলি কয় যদিও পিচমুহূৰ্ততে কয় যে আজিৰ পৰা বিপিএফ দলৰ হিমোগ্লবিন ৫ৰ তললৈ আহিব । সাধাৰণ মানুহৰ হিমোগ্লবিন ১৩ থাকিব লাগে বুলি মন্তব্য কৰি ব্ৰহ্মই কয় যে লোকসভা নিৰ্বাচনৰ পিচতে ২/৩ লৈ নামিব বিপিএফৰ হিমোগ্লবিন ।