لکھنؤ: وزیر دفاع راج ناتھ سنگھ کے بیٹے نیرج سنگھ راجستھان کے ادے پور میں کھیلے جانے والے آل انڈیا ماسٹرز رینکنگ بیڈمنٹن ٹورنامنٹ میں اتر پردیش کی نمائندگی کریں گے۔ نیرج نے پیر کو ٹویٹ کرکے یہ جانکاری شیئر کی۔ انہوں نے کہا، "آپ سب کو یہ بتاتے ہوئے خوش اور پرجوش ہوں کہ میں کل (آل انڈیا ماسٹرز رینکنگ بیڈمنٹن ٹورنامنٹ 2023 ادے پور) ڈبل زمرے میں اپنی ریاست اتر پردیش کی نمائندگی کرنے جا رہا ہوں یہ میرا پہلا قومی سطح کا گیم ہے"۔
اس کے بعد نیرج نے ایک اور ٹویٹ میں مداحوں سے اپیل کی کہ وہ ان کے اسپورٹس کیریئر کے لیے نیک خواہشات کا اظہار کریں۔ انہوں نے لکھا، "امید ہے کہ مجھے آپ کی تمام نیک خواہشات ملیں گی اور میں اپنی ریاست کا سر فخر سے بلند کروں گا۔" قابل ذکر ہے کہ نیرج سنگھ بھارتیہ جنتا پارٹی (بی جے پی) کے پروگراموں میں سرگرم رہتے ہیں۔ بیڈمنٹن کے ساتھ ان کی وابستگی کوئی نئی بات نہیں ہے۔ اس سے قبل بھی وہ کئی گھریلو مقابلوں میں حصہ لے چکے ہیں۔ قومی سطح پر یہ ان کا پہلا ٹورنامنٹ ہوگا جس میں وہ اتر پردیش کی نمائندگی کریں گے۔
یہ بھی پڑھیں: نوئیڈا کے ڈی ایم کے بیڈ منٹن ریکٹ کی بولی 10 کروڑ
انہوں نے بتایا کہ پہلی بار قومی سطح کے مقابلے میں حصہ لینا خوش قسمتی ہے۔ جس میں اتر پردیش کی نمائندگی اور بھی اہم ہے۔ اس لیے وہ تمغہ جیتنے کے بعد ریاست کے لوگوں کو ضرور تحفہ دینا چاہیں گے۔ اہم بات یہ ہے کہ نیرج سنگھ کے بڑے بھائی پنکج سنگھ نوئیڈا سے ایم ایل اے ہیں۔ وہ مسلسل دوسری بار نوئیڈا سے ایم ایل اے بنے ہیں اور سب سے بڑی جیت درج کرنے کے معاملے میں ان کا نام ٹاپ فائیو میں آتا ہے۔ بھارتیہ جنتا پارٹی میں کئی کھلاڑی ریٹائرمنٹ کے بعد سیاست کرنے آئے ہیں۔ جس میں مشہور بلے باز گوتم گمبھیر کے علاوہ ہریانہ کی ریسلر ببیتا پھوگٹ بھی شامل ہیں۔
یو این آئی
