علی گڑھ: منی پور کی مظلوم خواتین کو انصاف دلانے کے لیے علیگڑھ کلیکٹریٹ پر گزشتہ روز کانگریس پارٹی کے کارکنان کی جانب سے احتجاج کیا گیا جس میں کارکنان نے اپنا غصہ ظاہر کیا اور مجرموں کے خلاف سخت ترین سزا کا مطالبہ کیا۔ کلکٹریٹ میں داخل ہونے سے روکنے کی پولیس کی لاکھ کوششوں کے باوجود کارکنان اندر داخل ہو گئے اور زبردست احتجاج کیا۔
کانگریس لیڈر آغا یونس کی قیادت میں کانگریس کارکنوں نے منی پور میں فسادات اور خواتین پر تشدد کے خلاف احتجاج کیا، ہاتھوں میں بینرز اور پوسٹر اٹھائے ہوئے بی جے پی حکومت کے خلاف نعرے بازی بھی کی۔ کلکٹریٹ کے داخلی دروازے پر کانگریس کارکنوں اور پولس کے درمیان اندر داخل ہونے کو لے کر گرما گرم بحث بھی ہوئی۔
کانگریس لیڈر آغا یونس نے کہا کہ اس وقت منی پور جل رہا ہے اور وزیر اعظم خاموش بیٹھے ہیں، آج ملک کی حالت ایسی ہے جیسے روم جل رہا ہو اور نیرو سو رہا ہو۔ منی پور میں فسادات کے دوران بدمعاشوں نے 4 مئی کو خواتین کو برہنہ کرنے کے بعد ان کی پٹائی کی تھی۔ واقعے کی رپورٹ ڈیڑھ ماہ سے زائد گزرنے کے بعد درج کی گئی۔ اس طرح کے واقعے نے ملک کے ماتھے پر وہ دھبہ لگا دیا ہے جو کبھی نہیں دھل سکتا۔ آج ہماری خواتین کو برہنہ کیا جا رہا ہے، اسی لیے انہوں نے کارکنان کے ساتھ مظاہرہ کیا۔
یہ بھی پڑھیں: AMU Student گرفتار فیضان انصاری اے ایم یو کا طالب علم ہے
یونس نے کہا منی پور میں تشدد کے دوران سامنے آنے والی ایک حالیہ ویڈیو نے پوری قوم کو جھنجھوڑ دیا ہے۔ بین الاقوامی سطح پر ملک کی بدنامی ہو رہی ہے اس لئے ہم صدر جمہوریہ سے مطالبہ کرتے ہیں کہ منی پور حکومت کو فوری طور پر برطرف کرنے کے ساتھ ساتھ ملک کے وزیر اعظم نریندر مودی کو بھی برطرف کریں۔
