حیدرآباد: ریاست تلنگانہ کے ضلع سوریہ پیٹ میں پیش آئے سڑک حادثہ میں 15 زرعی مزدور زخمی ہوگئے۔ یہ خطرناک حادثہ ضلع کے مٹ پلی منڈل کے پیداووڈو میں پیش آیا۔ پولیس کے عہدیداروں جنہوں نے اس حادثہ کی تفصیلات بتائی کہا کہ تلنگانہ کے حضورآباد منڈل سے یہ مزدور، پڑوسی ریاست آندھراپردیش کے پلناڈو ضلع کے مُتیالم پاڈڈو جارہے تھے کہ ڈی سی ایم وین کے ڈرائیور نے مخالف سمت سے آنے والی گاڑی سے بچنے کی کوشش کے دوران اس کا توازن کھودیا اور یہ وین دوسری گاڑی سے بُری طرح ٹکرا گئی۔ اس حادثہ کے وقت گاڑی میں سوار 30 مزدوروں میں سے 15 زخمی ہوگئے، جن کو علاج کے لئے اسپتال منتقل کر دیا گیا ہے۔
عینی شاہدین نے کہا کہ حادثہ کا مقام دلخراش منظر پیش کررہا تھا۔ اس حادثہ میں دونوں گاڑیوں کو شدید نقصان پہنچا۔ انہوں نے مزید کہا کہ موٹرسائیکل سے امکانی ٹکر سے بچنے کے دوران وین کے ڈرائیور نے اس کا توازن کھودیا جس کے نتیجہ میں یہ حادثہ پیش آیا جس سے ٹریفک میں رکاوٹ پیدا ہوگئی۔اطلاع ملتے ہی وہاں پہنچی پولیس نے اس سلسلہ میں ایک معاملہ درج کرکے جانچ شروع کردی۔ واضح رہے کہ تلنگانہ میں آئے دن سڑک حادثات کے واقعات پیش آ رہا ہے۔ 29 مارچ کو ریاست کے نظام آباد میں ایک کار حادثے کا شکار ہو گئی تھی جس میں تین لوگ ہلاک ہو گئے تھے۔ یہ حادثہ ضلع کے بھیمگل علاقہ میں اُس وقت پیش آیا جب ایک ارتھ موور، کار سے ٹکرا گیا۔ اس حادثے میں دو افراد زخمی بھی ہوئے تھے۔
یہ بھی پڑھیں: Road Accident in Telangana تلنگانہ کے نظام آباد میں سڑک حادثہ، تین افراد ہلاک
یو این آئی
