بنگلور: کرناٹک اسمبلی انتخابات میں کانگریس کو شاندار کامیابی ملی ہے جس کے لئے کانگریس پارٹی کی جانب سے کرناٹک کے عوام کا شکریہ ادا کیا جارہا ہے۔ حال ہی میں کرناٹک وقف بورڈ کے چیئرمین شافی سعدی نے کانگریس سے مطالبہ کیا کہ کانگریس پارٹی اپنے مسلم ارکان اسمبلی سے کسی ایک کو ریاست کا نائب وزیر اعلی اور پانچ مسلم اراکین اسمبلی کو وزراء کے عہدے پر بحال کیا جائے۔
کرناٹک وقف بورڈ کے چیئرمین شافی سعدی کے اس مطالبہ پر کانگریس رہنما عبید اللہ شریف نے کہا کہ شافی سعدی وقف بورڈ میں ہو رہی بد عنوانیوں پر پردہ ڈالنے کی ہر ممکن کوشش کی، تاہم وہ ناکام ہی رہے۔ عبید اللہ شریف نے مزید کہا کہ شافی سعدی آر ایس ایس و بھارتیہ جنتا پارٹی کے ایجنٹ ہیں، لہٰذا ان کی جانب سے کانگریس سے کسی بھی طرح کا مطالبہ ناقابل قبول ہے۔
واضح رہے کہ شافی سعدی نے اپنے ایک بیان میں کہا تھا کہ 224 حلقوں میں سے 15 حلقوں میں مسلم امیدواروں نے انتخابات میں قسمت آزمائی کی،جن میں سے نو کو کامیابی ملی، اس کے علاوہ 72 اسمبلی حلقے ایسے ہیں جہاں کانگریس نے مسلمانوں کی حمایت کی وجہ سے کامیابی حاصل کی ہے، لہٰذا کانگریس پارٹی اس بات کو ذہن نشیں کرے اور مسلمانوں کا شکریہ ادا کرنے کے طور پرکسی ایک مسلم رکن اسمبلی نائب وزیر اعلی اور پانچ مسلم اراکین اسمبلی کو وزارء کے عہدے پر بحال کیا جائے ۔
مزید پڑھیں: Karnataka Politics سدارمیا کرناٹک کے نئے وزیر اعلیٰ، شیوکمار ہوں گے نائب وزیر اعلیٰ
شافی سعدی نے کہا تھا کہ کانگریس کی جیت میں مسلمانوں نے اہم کردار ادا کیا ہے۔ اس کے بدلے میں ہم ایک مسلم نائب وزیر اعلیٰ اور پانچ اہم وزراء جیسے وزارت داخہ، ریونیو اور شعبہ تعلیم میں عہدہ کا مطالبہ کرتے ہیں۔انہوں نے کہا کہ ہم نے سنی علما بورڈ کے دفتر میں ایک ہنگامی میٹنگ کی تاکہ ان مطالبات پر عمل درآمد کو یقینی بنایا جا سکے۔
