ملک میں پھیلی ہوئی وبا کورونا وائرس کی دوسری لہر کی احتیاطی تدابیر کے پیشِ نظر اور ریاستی حکومت کی جانب سے جاری کی گئی گائڈ لائن کی وجہ سے عبادت گاہ اور درگاہ کو عوام کے لئے کھولنے کی اجازت نہ دینے پر درگاہ کے سجادہ نشین ڈاکٹر خسرو حسینی نے اس سال حضرت خواجہ بندہ نواز گیسو درازؒ کے عرس شریف کو محدود پیمانے پر منایا۔
اس دوران گزشتہ سال کی طرح اس سال بھی قدیم روایت کے مطابق تاریخی محبوب گلشن سے جلوس صندل مبارک نہیں نکالا گیا اور نہ ہی ملک گیر شہرت یافتہ صنعتی نمائش خواجہ بازار کے انعقاد کی اجازت دی گئی۔
قدیم روایت برقرار رکھتے ہوئے صندل مبارک کی کشتیاں صدر صوفہ ڈیوڑھی سجادہ نشین سے برآمد کی گئیں۔ اس سے قبل محفلِ سماع منعقد ہوئی۔ اس موقع پر محبوب بندہ نوازی، تحسین خان قوال نے مبارک باشد پڑھیں اور کلام سنایا۔ فاتحہ خوانی پر محفل سماع کا اختتام ہوا۔
یہ بھی پڑھیں: بدایوں: کورونا گائڈ لائن کے مطابق شاہ شجاعت کا عرس منایا گیا
سجادہ نشین صندل مبارک کی کشتیاں اپنے سر پر اٹھاکر درگاہ شریف کے لئے روانہ ہوئے صدر صوفہ سے صندل مبارک کا مختصر جلوس میلاد خوانی کے ساتھ ہوا۔
