وادی کشمیر کے بالائی علاقوں کے ساتھ ساتھ میدانی علاقوں میں بھی دو دن سے برف باری کا سلسلہ جاری ہے۔جس کی وجہ سے وادی میں معمولات زندگی متاثر ہوئی ہے اور جمعرات کی صبح سے بجلی کی سپلائی میں بھی خلل پڑا ہے۔
اطلاعات کے مطابق بجبہاڑہ کے آرونی گنڈ چہل علاقے میں برفانی طوفان کی وجہ سے ایک خاتون ہلاک ہوگئی۔ ہلاک شدہ خاتون کی شناخت پروینہ کے طور پر ہوئی ہے۔بتایا جارہا ہے کہ ان کے مکان کو بھی کافی نقصان پہنچا ہے۔
واضح رہے کہ گذشتہ روز وادی کشمیر کے مختلف علاقوں میں برف باری کے الگ الگ واقعات میں 4 افراد ہلاک ہوئے تھے۔
وادی کے بیشتر اضلاع میں برفباری سے جہاں پیڑوں پر موجود میوہ ضائع ہوا ہے وہیں پھل دار درختوں کو بھی کافی نقصان ہوا ہے جس کا تحمینہ ابھی انتظامیہ نے نہیں کیا ہے۔
