بی جے پی، ڈی ڈی سی انتخابات کو تعمیر و ترقی کے نئے زاویے سے دیکھتی ہے اور مودی جی جموں و کشمیر کو ایک ترقی یافتہ مقام بنانے کے لیے کوششیں کر رہے ہیں۔ ان خیالات کا اظہار جموں و کشمیر بی جے پی کے ترجمان الطاف ٹھاکر نے آج اپنا ووٹ ڈالنے کے بعد ای ٹی وی بھارت کے ساتھ ایک خصوصی بات چیت میں کیا۔
انہوں نے بتایا کہ ڈاڈسرہ حلقے میں لوگ بہت کم ووٹ ڈالتے تھے۔ تاہم آج لوگوں نے گھروں سے نکل کر جمہوریت کو مضبوط کیا ہے۔
الطاف ٹھاکر جو کہ اس حلقہ سے بھاجپا کے امیدوار بھی ہیں نے بتایا کہ اگر وہ یہاں سے جیت جاتے ہیں تو وہ ڈاڈسرہ کو ایک ماڈل بلاک بنادیں گے ۔
انہوں نے مزید کہا کہ عالمی وباء کورونا وائرس کی وجہ سے پوری دُنیا میں ترقی کی رفتار دھیمی پڑ گئی اور بھارت میں بھی اس کا اثر رہا۔ تاہم اب بھارت اور جموں و کشمیر ترقی کی راہ پر گامزن ہوگا۔
گپکار الائنس پر بات کرتے ہوئے الطاف ٹھاکر نے بتایا کہ گپکار گینگ مفاد پرستوں کا ایک ٹولہ تھا جو اب بے نقاب ہوگیا ہے۔
