نئی دہلی: مختلف کھلاڑیوں نے احتجاج کرنے والے پہلوانوں کے خلاف اپنی تشویش کا اظہار کیا ہے لیکن سابق ہندوستانی کپتان اور بی سی سی آئی کے سابق صدر سورو گنگولی نے کہا کہ وہ اس معاملے پر مکمل معلومات کے بغیر بات نہیں کریں گے۔ گنگولی نے امید ظاہر کی کہ یہ معاملہ حل ہو جائے گا کیونکہ پہلوانوں نے متعدد تمغے جیت کر ملک کا نام روشن کیا ہے۔ اولمپک میڈلسٹ بجرنگ پونیا اور ساکشی ملک اور ایشین اینڈ کامن ویلتھ گیمز میڈلسٹ ونیش پھوگاٹ کی قیادت میں پہلوان پچھلے کئی دنوں سے جنتر منتر پر دھرنا دے رہے ہیں۔ وہ خواتین پہلوانوں کو جنسی طور پر ہراساں کرنے کے الزام میں ریسلنگ فیڈریشن آف انڈیا کے سربراہ برج بھوشن شرن سنگھ کی گرفتاری کا مطالبہ کر رہے ہیں۔
گنگولی نے جمعہ کو ایک پروگرام میں کہا کہ انہیں اپنی لڑائی خود لڑنے دیں، مجھے نہیں معلوم کہ کیا ہوا ہے۔ میں نے اس کے بارے میں صرف اخبارات میں پڑھا ہے۔ میں ایک بات جانتا ہوں کہ جب تک آپ کو مکمل معلومات نہ ہوں آپ اس مسئلے پر بات نہیں کر سکتے۔ ان کا مزید کہنا تھا کہ مجھے امید ہے کہ معاملہ حل ہو جائے گا۔ ان پہلوانوں نے کئی تمغے جیتے اور ملک کا نام روشن کیا۔ دریں اثنا، کھیل اور نوجوانوں کے امور کے مرکزی وزیر انوراگ ٹھاکر نے برج بھوشن کے خلاف احتجاج کرنے والے پہلوانوں سے کہا ہے کہ حکومت نے کھلاڑیوں کے تمام مطالبات مان لیے ہیں۔ اب ان سے درخواست ہے کہ غیرجانبدارانہ تحقیقات کی اجازت دیں. تبھی دودھ کا دودھ اور پانی کا پانی ہو جائے گا۔ لکھنؤ میں صحافیوں سے بات کرتے ہوئے ٹھاکر نے کہا کہ مودی حکومت کھیلوں کو فروغ دے رہی ہے۔ اسی لیے ہماری حکومت نے اپنے بجٹ میں اضافہ کیا ہے، حکومت نے دہلی میں احتجاج کرنے والے کھلاڑیوں کے تمام جائز مطالبات مان لیے ہیں۔ دہلی پولیس منصفانہ تحقیقات کر رہی ہے۔ قصورواروں کے خلاف کارروائی کریں گے۔ اس لیے پہلوانوں کو ہڑتال ختم کرنی چاہیے۔
یہ بھی پڑھیں:
انہوں نے کہا کہ جہاں تک کھلاڑیوں کے مطالبات کا تعلق ہے تو میں کہوں گا کہ ان کا مطالبہ منصفانہ انتخابات سے متعلق تھا، اس کے لیے تیاریاں کی جا رہی ہیں۔ کمیٹی تشکیل دینے کا مطالبہ کیا گیا۔ اس کے لیے کمیٹی بھی تشکیل دی گئی ہے۔ منصفانہ جانچ کی مانگ تھی، دہلی پولیس بھی وہ کر رہی ہے۔ سپریم کورٹ نے بھی اپنا فیصلہ سنا دیا ہے۔ میری درخواست ہے کہ جو بھی کھلاڑی وہاں احتجاج کر رہے ہیں، اس کی شفاف تحقیقات ہونی چاہیے۔ احتجاج کرنے والے پہلوانوں نے تاہم کہا ہے کہ جب تک برج بھوشن کو سلاخوں کے پیچھے نہیں بھیجا جاتا وہ اپنی ہڑتال جاری رکھیں گے۔
(آئی اے این ایس)
