حیدرآباد: 2 اکتوبر 1869 کو پوربندر، گجرات میں پیدا ہونے والے مہاتما گاندھی نے اپنی زندگی برطانوی راج کے خلاف آزادی کی جدوجہد میں ہندوستان کی قیادت کے لیے وقف کردی تھی۔ عدم تشدد پر مبنی سخت جدوجہد کے لیے ان کا اصولی انداز ناقابل فراموش ہے۔
موہن داس کرم چند گاندھی، جنہیں مہاتما گاندھی یا باپو کے نام سے جانا جاتا ہے، ہندوستان کے ایک ممتاز سیاسی اور روحانی رہنما تھے۔ گاندھی جی نے تحریک عدم تعاون، ڈانڈی مارچ، اور بھارت چھوڑو تحریک جیسی اہم تحریکوں کی قیادت کی۔
گاندھی جی کی حکمت عملی جیسے ستیہ گرہ (سچائی طاقت) اور عدم تشدد برطانوی حکومت کے خلاف طاقتور ثابت ہوئی۔ 1917 میں چمپارن ستیہ گرہ سے شروع ہو کر 1942 میں ہندوستان چھوڑو تحریک تک، گاندھی جی نے تمام شعبہ سے تعلق رکھنے والے لوگوں کو متحد کرکے ملک بھر میں لوگوں کے دلوں میں آزادی کی آگ بھڑکا دی تھی۔
مہاتما گاندھی کا خاندان:
گاندھی جی کے والد کرم چند گاندھی برطانوی ہندوستان کی ریاست پوربندر کے دیوان ( وزیراعلی) تھے۔ گاندھی جی کی ماں پوتلی بائی کرم چند کی چوتھی بیوی تھی۔ 13 سال کی عمر میں گاندھی جی کی شادی 14 سال کی کستوربا سے ہوئی۔گاندھی جی نے سمالداس کالج، گجرات سے میٹرک کا امتحان کامیاب کیا۔ 4 ستمبر 1888 کو گاندھی جی یونیورسٹی کالج لندن میں قانون کی تعلیم حاصل کرنے لندن روانہ ہوئے۔
تحریک آزادی میں مہاتما گاندھی کا کردار
چمپارن ستیہ گرہ (1917)
سنہ 1917 کا چمپارن ستیہ گرہ ہندوستان میں گاندھی کی زیرقیادت پہلی ستیہ گرہ تحریک تھی اور اس تحریک ہندوستانی تحریک آزادی میں تاریخی طور پر ایک اہم بغاوت سمجھا جاتا ہے۔ یہ کسانوں کی بغاوت تھی جو ہندوستان کے بہار کے چمپارن ضلع میں برطانوی نوآبادیاتی دور میں ہوئی تھی۔ جب گاندھی 1915 میں جنوبی افریقہ سے ہندوستان واپس لوٹے اور انہوں نے شمالی ہندوستان میں کسانوں پر نیل کے باغبانوں کا ظلم دیکھا تو گاندھی جی نے وہی طریقے استعمال کرنے کی کوشش کی جو انہوں نے جنوبی افریقہ میں ناانصافی کے خلاف استعمال کیے تھے۔
کھیڑا ستیہ گرہ (1917-1918)
جب گجرات کا ایک گاؤں کھیڑا سیلاب سے بری طرح متاثر ہوا تو مقامی کسانوں نے ٹیکس معاف کرنے کی اپیل کی۔ گاندھی جی نے ٹیکس معافی کے لئے دستخطی مہم شروع کی جہاں کسانوں نے ٹیکس کی عدم ادائیگی کا عہد کیا۔
تحریک عدم تعاون (1920)
گاندھی نے عدم تعاون کی تحریک شروع کی۔ کانگریس کی حمایت اور ان کے ناقابل تسخیر جذبے کے ساتھ گاندھی جی نے لوگوں کو قائل کیا کہ پرامن عدم تعاون تحریک آزادی کی کلید ہے۔ جلیانوالہ باغ قتل عام کے منحوس دن کی وجہ سے تحریک عدم تعاون وجود میں آئی۔
مزید پڑھیں: گاندھی جی کے یوم پیدائش پر خصوصی رپورٹ
ڈانڈی مارچ 12 مارچ 1930 کو شروع ہوا اور 6 اپریل 1930 کو ختم ہوا۔ گاندھی جی نے اپنے سابرمتی آشرم سے سمندر کے راستے اس تحریک کا آغاز کیا تھا۔ ڈانڈی مارچ کے باعث ہی گاندھی جی قانون کی نظر میں مجرم بن گئے تھے۔
ہندوستان چھوڑو تحریک (1942)
گاندھی جی نے دوسری جنگ عظیم کے دوران برطانوی راج کے خلاف ہندوستان چھوڑو تحریک کا آغاز کیا تھا۔ گاندھی جی یہ تحریک اس وقت شروع کی تھی جب انگریزوں نے دوسری جنگ عظیم کے لیے ہندوستانی افراد کو بھرتی کرنا شروع کیا۔ گاندھی جی نے اس بھرتی کے خلاف سخت احتجاج کیا اور کہا کہ ہندوستانی عوام اس جنگ میں شامل نہیں ہوسکتے جو جمہوری مقاصد کے حق میں ہو جب کہ ہندوستان خود ایک آزاد ملک نہیں تھا۔ اس تحریک نے ہندوستان میں کافی زور پکڑا اور یہ تحریک ہندوستانی عوام میں کافی مقبول ہوئی اور اسی تحریک کے باعث نصف دہائی کے اندر ہی ہندوستان کو آزادی حاصل ہوئی۔
گاندھی کا قتل:۔
30 جنوری 1948 کو نئی دہلی میں گاندھی جی کو ایک ہندو انتہا پسند ناتھورام گوڈسے نے قتل کر دیا۔ گوڈسے نے پاکستان کے تئیں گاندھی کی ہمدردی کی مخالفت کی، اور اسی وجہ سے ہندوستان کی تحریک آزادی کی قیادت کرنے والے مہاتما گاندھی کا قتل ہوا۔ گاندھی کی میراث زندہ ہے، اور انہیں ہر سال گاندھی جینتی کے موقع پر سچائی اور عدم تشدد کے لیے ان کی غیر متزلزل وابستگی کے لیے یاد کیا جاتا ہے۔ اسی دن ہندوستان میں ایک قومی تعطیل ہوتی ہے۔
