بارہمولہ: شمالی کشمیر کے ضلع بارہمولہ کے سرحدی علاقہ بونيار، اوڑی کے باشندوں نے محکمہ بجلی، انتظامیہ کے خلاف احتجاج کیا۔ احتجاج میں مقامی باشندوں کے علاوہ پنچ، سرپنچ صاحبان سمیت دیگر پی آر آئی ممبران نے بھی شرکت کرکے بجلی کی کٹوتی، ماہانہ بجلی بل میں اضافہ پر احتجاج کیا۔ احتجاجیوں نے انتظامیہ پر بونیار، اوڑی کے باشندوں کو بنیادی سہولیات سے محروم رکھنے کا الزام عائد کیا۔ URI residents Demand uninterrupted Power supply
احتجاج میں شامل بی ڈی سی چیئرمین نے میڈیا نمائندوں کے ساتھ بات کرتے ہوئے دعویٰ کیا کہ ’’ہمارے علاقے کو پوری طرح سے نظر انداز کیا گیا ہے۔ حکام نے دعویٰ کیا تھا کہ لوگوں کو مفت بجلی فراہم کی جائے گی تاہم بجلی کا علاقے میں کہیں نام و نشان بھی نہیں ہے، مزید برآنکہ ماہانہ بجلی فیس میں بھی اضافہ کیا گیا ہے۔‘‘
احتجاج میں شامل سینکڑوں افراد نے انتظامیہ، محکمہ بجلی کے خلاف ناراضگی کا اظہار کرتے ہوئے کہا: ’’انتظامیہ نے یہاں کی عوام کے جذبات کے ساتھ ہمیشہ کھلواڑ کیا ہے۔ ہمیں بجلی جیسی بنیادی ضرورت سے محروم رکھا جا رہا ہے۔‘‘ احتجاجیوں کا کہنا ہے کہ اگر لوگوں کے مطالبات تسلیم نہ کیے گئے تو وہ احتجاج میں مزید شدت لانے پر مجبور ہو جائیں گے۔ انہوں نے کہا: ’’اگر انتظامیہ لوگوں کو بنیادی ضروریات فراہم کرنے میں ناکام رہی تو آئندہ اجتماعی طور پر بھوک ہڑتال کیا جائے گا۔‘‘
بی ڈی سی ممبران بشمول، پنچ سرپنچ صاحبان نے انتباہ کرتے ہوئے کہا: ’’اگر ہماری جائز مانگوں کو پورا نہیں کیا گیا تو پی آر آئی ممبران اجتماعی طور مستعفی ہونے کے لیے تیار ہیں۔‘‘
مزید پڑھیں: Frequent Power cuts Irks Consumers بجلی کی آنکھ مچولی سے عوام پریشان
