اننت ناگ میں منشیات فروش گرفتار

اننت ناگ پولیس نے منشیات کے خلاف کارروائی جاری رکھتے ہوئے پوجی ٹنگ، بجبہاڑہ سے تعلق رکھنے والے ایک شخص کو گرفتار کرکے اسکی تحویل سے منشیات برآمد کرنے کا دعویٰ کیا ہے۔

جنوبی کشمیر کے ضلع اننت ناگ کے بجبہاڑہ علاقے میں جموں و کشمیر پولیس کو منشیات فروشی سے متعلق ایک خفیہ اطلاع موصول ہوئی، جس کے بعد اننت ناگ پولیس نے منشیات فروشوں کا شکنجا کسنے کے لئے سنگم، بجبہاڑہ کے مقام پر ناکہ قائم کیا۔

ناکہ چیکنگ کے دوران پولیس نے پوجی ٹنگ، بجبہاڑہ سے تعلق رکھنے والے توصیف احمد پرے نامی ایک شخص کی تحویل سے کوڈین فاسفیٹ کی 12 بوتلوں سمیت 10 گرام ہیروئین ضبط کرکے اسے حراست میں لے لیا۔

اس سلسلے میں بجبہاڑہ پولیس اسٹیشن میں این ڈی پی ایس ایکٹ کے تحت کیس درج کر لیا گیا ہے اور پولیس نے مزید تحقیقات شروع کردی ہے۔

اننت ناگ پولیس نے عوام سے اپیل کی ہے کہ وہ منشیات فروشوں سے متعلق معلومات کے ساتھ آگے آئیں تاکہ معاشرے کو منشیات سے پاک کیا جاسکے۔

واضح رہے کہ گزشتہ کئی روز سے بجبہاڑہ کے مختلف علاقوں میں پولیس کی جانب سے منشیات فروشوں کے خلاف کارروائیاں انجام دی جارہی ہیں جس کی عوامی حلقوں کی جانب سے بھی پذیرائی کی جارہی ہے۔