انگلینڈ کے کپتان جو روٹ اور تیز گیند باز جیمس اینڈرسن چنئی ٹیسٹ میں فاتحانہ کارکردگی کی بدولت آئی سی سی کی تازی ترین ٹیسٹ درجہ بندی میں بالترتیب بیٹنگ اور بالنگ میں تیسری پوزیشن پر پہنچ گئے ہیں جبکہ وراٹ کوہلی پانچویں نمبر پر چلے گئے ہیں۔
جو روٹ نے چنئی ٹیسٹ کی پہلی اننگز میں 218 اور دوسری اننگز میں 40 رنز بنا کر ٹیم کی 227 رنز سے جیت میں اہم کردار ادا کیا تھا۔
اس سے قبل روٹ نے سری لنکا کے دورہ میں دو ٹیسٹ میں 228 اور 186 رنز کی اننگ کھیلی تھی۔ برصغیر پاک و ہند میں کھیلے گئے تین ٹیسٹ میچوں میں جو روٹ اب تک 684 رنز بنا چکے ہیں۔
انگلینڈ کے کپتان نے درجہ بندی میں دو مقامات کی چھلانگ لگائی اور تیسرے نمبر پر پہنچ گئے انہوں نے بھارتی کپتان وراٹ کوہلی اور آسٹریلیائی بلے باز مارنس لابیوشین کو پیچھے چھوڑ کر تیسری پوزیشن حاصل کی ہے۔
روٹ کے پاس اب 883 ریٹنگ پوائنٹس ہیں اور وہ دوسرے نمبر پر براجمان آسٹریلیا کے اسٹیو اسمتھ سے آٹھ پوائنٹس اور سرفہرست نیوزی لینڈ کے کین ولیمسن سے 36 پوائنٹس پیچھے ہیں۔
جو روٹ کی درجہ بندی ستمبر 2017 کے بعد سے یہ اب تک کی بہترین کارکردگی ہے۔ جبکہ وراٹ نومبر 2017 کے بعد پہلی بار ٹاپ تین بلے بازوں سے باہر ہوئے ہیں۔
