ریاست بہار کے شہر گیا میں واقع خانقاہ چشتیہ منعمیہ ابوالعلائیہ میں پوری آب و تاب کے ساتھ ماہ ربیع الاول شریف کی چاند رات سے مجلس سیرت النبی صلی اللہ علیہ وسلم کا انعقاد کیا جارہا ہے، جس میں خانقاہ کے صاحب سجادہ مولانا سید شاہ محمد صباح الدین منعمی مکمل سیرت رسول اکرم صلی اللہ علیہ وسلم بیان فرماتے ہیں۔
12 ربیع الاول شریف کو بیان مکمل ہوتا ہے، جس کے بعد سرکارِ دو عالم صلی اللہ علیہ وسلم کے موئے مبارک کی زیارت ہر خاص و عام کو کرائی جاتی ہے اور تزک واحتشام کے ساتھ یہاں سبھی مجالس کا اہتمام ہوتا ہے۔
خانقاہ کے ناظم سید عطاء فیصل کہتے ہیں کہ آج کی بھاگ دوڑ بھری زندگی میں انسان اس قدر دنیا کے لئے مصروف اور کوشاں ہے کہ اسے صحیح اور غلط کی تمیز، جائز و ناجائز کی امتیاز، حقوق العباد کی رعایت والدین کی عظمت و رفعت سے نا آشنا ہے۔ ہونا تو یہ چاہیے تھا کہ اسلام کی بنیاد کا مطالعہ کرتے، علماء و مشائخ کی صحبت اختیار کرکے جاننے اور سیکھنے کا معاملہ طے کرتے یہیں سے ہمارے معاشرے میں بکھراو کی شروعات ہوتی ہے۔ سیرت النبی کا مطالعہ کریں گے تو مکمل ضابطہ حیات ملے گا۔
واضح رہے کہ خانقاہ چشتیہ منعمیہ ابوالعلائیہ رام ساگر بہار کی چند قدیم خانقاہوں میں ایک ہے ہر برس ربیع الاول شریف میں یہاں بعد نماز عشاء سیرت النبی کی مجلس منعقد ہوتی ہے جس میں بڑی تعداد عاشقان رسول کی شرکت ہوتی ہے۔
