انگلینڈ کے مانچیسٹر میں ہونے والا بھارت اور انگلینڈ کے درمیان پانچویں ٹیسٹ میچ کو منسوخ کردیا گیا ہے۔ یہ فیصلہ بورڈ آف کنٹرول فار کرکٹ ان انڈیا (بی سی سی آئی) اور انگلینڈ اینڈ ویلز کرکٹ بورڈ (ای سی بی) نے جمعرات اور جمعہ کو تبادلہ خیال کے بعد کیا ہے۔
واضح رہے کہ انگلینڈ کے خلاف پانچویں اور آخری ٹیسٹ سے پہلے بھارتی فزیو یوگیش پرمار کا کووڈ ٹیسٹ مثبت آیا تھا۔ اس کی وجہ سے ٹیم انڈیا کا جمعرات کی دوپہر کا تربیتی سیشن منسوخ کردیا گیا۔
تاہم انگلینڈ کیمپ میں کووڈ 19 سے متعلق کوئی بھی کیسز نہیں ہے اور جوس بٹلر نے کہا کہ سب کچھ ٹھیک ہے اور میزبان کھیل کے منتظر ہیں۔
بٹلر نے ایک ورچوئل پریس کانفرنس میں کہا کہ "ہم اس وقت اس کے بارے میں زیادہ نہیں جانتے کہ کیا ہو رہا ہے اس کے بارے میں قیاس آرائی کرنا بے وقوفی ہوگی۔ اس وقت ہم مکمل طور پر توقع کر رہے ہیں کہ کھیل شروع ہوگا اور ہم اسی کے مطابق تیاری بھی کر رہے ہیں۔ ہمارے کیمپ میں حالات ٹھیک ہیں اور ہم کھیل کے منتظر ہیں۔"
اس سے قبل بھارت کے ہیڈ کوچ روی شاستری، بولنگ کوچ بھرت ارون اور فیلڈنگ کوچ آر سریدھر کے چوتھے ٹیسٹ کے دوران ان کے RT-PCR ٹیسٹ کے نتائج مثبت آیا تھا۔ وہ فی الحال قرنطینہ میں ہیں اور دو منفی نتائج واپس آنے کے بعد ہی باہر آسکتے ہیں۔
