بھارت کے وزیر خارجہ ڈاکٹر ایس جے شنکر نے جمعہ کو ، انڈونیشیا کے بالی میں منعقد جی 20 وزرائے خارجہ کی میٹنگ کے موقع پر روس، فرانس اور امریکہ کے وزرائے خارجہ کے ساتھ بات چیت کی۔ ڈاکٹر جے شنکر نے ٹویٹ کیا کہ انہوں نے روسی وزیر خارجہ سرگئی لاوروف کے ساتھ باہمی دلچسپی کے دو طرفہ امور پر بات چیت کی اور اس کے ساتھ ہی یوکرین جنگ اور افغانستان سمیت دنیا کے کئی علاقائی مسائل پر بھی تبادلہ خیال کیا۔
دونوں ممالک کے وزرائے خارجہ کے درمیان یہ بات چیت وزیر اعظم نریندر مودی اور روسی صدر ولادیمیر پوتن کے درمیان ٹیلی فونک گفتگو کے ایک ہفتہ بعد ہوئی اور یوکرین کے بحران کے پس منظر میں عالمی توانائی اور خوراک کی منڈیوں کی حالت پر بھی تبادلہ خیال کیا۔
یہ بھی پڑھیں: Special ASEAN India FM Meeting: آج کے دور میں آسیان کا کردار زیادہ اہم ہے، وزیر خارجہ ایس جے شنکر
اس کے علاوہ وزیر خارجہ ایس جے شنکر نے جمعہ کو امریکی وزیر خارجہ انٹونی بلنکن سے بھی ملاقات کی اور مختلف چیلنجوں پر تبادلہ خیال کیا۔ میٹنگ کے بعد جے شنکر نے ٹویٹ کیا، "اس مرتبہ بالی میں G20 کے وزرائے خارجہ کی میٹنگ میں، بلنکن کے ساتھ عالمی اور علاقائی مسائل پر بات چیت جاری رہی۔ ہمارے تعلقات آج ہمیں بہتر تفہیم اور کھلے پن کے ساتھ مختلف قسم کے چیلنجوں پر بات چیت کرنے کے قابل بناتے ہیں۔
وزیر خارجہ نے اپنی فرانسیسی ہم منصب کیتھرین کولونا سے بھی ملاقات کی۔ فرانسیسی وزیر خارجہ کا عہدہ سنبھالنے کے بعد یہ ان کی پہلی ملاقات تھی۔ ڈاکٹر جے شنکر نے کہا کہ انہوں نے باہمی تعلقات کو مضبوط بنانے اور اس کے لیے مل کر کام کرنے کے معاملے پر تبادلہ خیال کیا۔ دونوں ممالک کے وزرائے خارجہ کے درمیان دنیا کو درپیش نئے چیلنجز پر بھی تبادلہ خیال کیا گیا۔
