بھارتی فوج کے لیے 15 جنوری کا دن خصوصی اہمیت کا حامل ہے، اس دن کو آرمی ڈے کے طور پر منایا جاتا ہے۔ آج فوج اپنا 73 واں یوم تاسیس منا رہی ہے۔ اس موقع پر دارالحکومت دہلی کے كريپا پریڈ گراؤنڈ میں فوجی پریڈ کا انعقاد کیا گیا۔ آرمی چیف جنرل ایم ایم ناروا نے پریڈ کی سلامی لیں گے اور فوجیوں سے خطاب کریں گے۔
وہیں اس خاص دن کے موقع پر صدر جمہوریہ رام ناتھ کووند، وزیراعظم نریندر مودی، مرکزی وزیر داخلہ امت شاہ، مرکزی وزیر دفاع راج ناتھ سنگھ نے آرمی ڈے کی مبارک باد بھی پیش کی۔
آرمی ڈے کے موقع پر وزیر اعظم نریندر مودی نے بھارتی فوج کو سلام کیا۔ انہوں نے ٹوئیٹ کرتے ہوئے لکھا کہ ، 'ماں بھارتی کی حفاظت کر رہے ملک کے طاقتور فوجیوں اور ان کے کنبہ کے افراد کو آرمی ڈے کی دلی مبارکباد دے رہا ہوں۔ ہماری فوج مضبوط، بہادر اور پر عزم ہے ، جس نے ہمیشہ فخر کے ساتھ ملک کا سر بلند کیا۔ میں تمام شہریوں کی طرف سے بھارتی فوج کو سلام پیش کرتا ہوں۔
وہیں آرمی ڈے کی مبارکباد دیتے ہوئے صدر جمہوریہ کووند نے لکھا کہ 'آرمی ڈے کے موقع پر بھارتی فوج کے بہادر مردوں اور خواتین کو مبارکباد۔ ہمیں وہ بہادر لوگ یاد ہیں جنہوں نے قوم کی خدمت میں قربانی دی ہے۔ بھارت بہادر اور پرعزم فوجیوں اور ان کے اہل خانہ کا ہمیشہ شکر گزار رہے گا۔
چیف آف ڈیفنس اسٹاف (سی ڈی ایس) جنرل بپن راوت نے ٹوئیٹ کرتےہوئے لکھا کہ، 'ہم ان بہادر سپاہیوں کو خراج تحسین پیش کرتے ہیں اور ان کا شکریہ ادا کرتے ہیں، جن کی بہادری اور ملک کے تئیں اپنے فرائض کے لئے قربانی ہمیں نئے سرے سے مضبوطی کے ساتھ خود کو وقف کرنے کی ترغیب دیتی ہے۔
بھارتی فوج 15 جنوری 1949 کے دن ہی برطانوی فوج سے پوری طرح آزاد ہوئی تھی۔ کے ایم کیریپا نے بھارت فوج کے پہلے کمانڈر ان چیف کی حیثیت سے ذمہ داریاں سنبھالیں۔ اس دن کے بعد سے ہی ہر برس 15 جنوری کو آرمی ڈے منایا جاتا ہے۔اس خاص موقع پر پورا ملک فوج کے بہادر جوانوں کی شہادت کو یاد کرتا ہے۔
دہلی کے انڈیا گیٹ پر واقع امر جوان جوتی میں شہدا کو خراج تحسین پیش کیا جاتا ہے۔ ساتھ ہی شہدا کی بیوہ خواتین یا کنبہ کے افراد کو آرمی میڈلز اور دیگر ایوارڈز سے نوازا جاتا ہے۔آج بھارتی فو ج کے 53 کنٹونمینٹ اور نو آرمی بیس ہیں۔
