پلوامہ:ضلع ترقیاتی کمشنر پلوامہ کی ہدایات پر ترال میں انتظامیہ نے تحصیل آری پل کے لام جواہر پورہ علاقے میں ناجائز تجاوزات کو ہٹانے کی ایک مہم شروع کی جس دوران کئ ناجائز تعمیرات کو منہدم کیا گیا۔ اے ڈی سی ترال شبیر احمد رینہ کی زیر نگرانی منہدم کاروائی انجام دی جارہی ہے۔ اس موقع پر محکمہ مال اور اریگیشن کے عہدیدار بھی موجود تھے۔ عوامی مزاحمت کو روکنے کے لیے پولیس اور سی آر پی ایف کے جوانوں کو تعینات کیا گیا تھا ۔ تاہم اس دوران انتظامیہ کو کسی بھی طرح کی عوامی مزاحمت کا سامنا نہ کرنا پڑا اس دوران معلوم ہوا ہے کہ انہدامی مہم کا مقصد سویناڈ گاوں کے لیے لنک روڈ کے لیے جگہ کی فراہمی کو یقینی بنانا تھا۔
اس راستے پر کئ حریص لوگوں نے اریگیشن کی زمین پر قبضہ کرلیا تھا۔ جس کے بعد ان کو آگاہ کیا گیا اور انتظامیہ کے ساتھ تعاون کرنے کی اپیل کی گئی تھی ۔تاہم تعاون نہ کرنے کے بعد انتظامیہ حرکت میں آگئی اور انہدامی مہم شروع کی گئی۔ اے ڈی سی ترال شبیر احمد رینہ نے ای ٹی وی بھارت کو بتایا کہ کچھ لوگوں نے اریگیشن محکمے کی ملکیتی اراضی پر ناجائز قبضہ کیا تھا اور انتظامیہ کو ایک لنک روڈ کی تعمیر کے لیے یہ تجاوزات ہٹانا پڑا ۔انہوں نے عوام سے اپیل کی کہ وہ ناجائز تجاوزات کو ہٹانے کے لیے ازخود آگے آئیں۔
