پہاڑی ضلع کشتواڑ میں ڈی ڈی چیئرپرسن پوجا ٹھاکر نے ٹھاکرائی علاقے کا دورہ کرکے عوامی دربار کے دوران لوگوں کے مسائل سنے۔
ٹھاکرائی کے باشندوں نے ڈی ڈی سی چیئرپرسن کو علاقے میں درپیش مسائل سے آگاہ کیا۔
میڈیا سے گفتگو کرتے ہوئے ڈی ڈی سی چیئرپرسن نے کہا کہ ’’پہاڑی علاقہ ٹھاکرائی میں بھی دیگر علاقوں کی طرح بنیادی ضروریات کا فقدان ہے۔ لوگوں نے پینے کے پانی، بجلی، سڑک اور شعبہ صحت سے متعلق شکایات کیں۔‘‘
مزید پڑھیں: ہارٹیکلچر شعبے کو مستحکم بنانا مرکزی سرکار کی اولین ترجیح: مرکزی وزیر زراعت
انہوں نے مزید کہا کہ علاقے کی بیشتر آبادی خط افلاس سے نیچے زندگی گزار رہی ہے اور پردھان منتری آواس یوجنا کے تحت کئی افراد کو مکان بنانے کے لیے رقم دینے کا وعدہ کیا گیا ہے تاہم ابھی تک انہیں رقومات واگزار نہیں کی گئی ہیں۔
انہوں نے کہا کہ وہ علاقے میں درپیش مسائل اعلیٰ حکام تک پہنچائیں گی اور عوام کو راحت پہنچانے کی پوری کوشش کی جائے گی۔
