سری نگر: کانگریس سے علیٰحدگی اختیار کرنے والے غلام نبی آزاد کے ساتھ جموں و کشمیر کے متعدد سابق ممبران اسمبلی اور سینئر لیڈران نے نئی دہلی میں ملاقات کی۔ معلوم ہوا ہے کہ ستمبر میں غلام نبی آزاد ایک نئی سیاسی پارٹی تشکیل دے رہے ہیں اور اس میں کئی سیاسی پارٹیوں کے لیڈران نے شمولیت اختیار کرنے کا من بنالیا ہے۔ ذرائع نے بتایا کہ غلام نبی آزاد آنے والے دنوں میں جموں و کشمیر آرہے ہیں اور اُن کے استقبال کی خاطر تیاریاں زور و شور سے جاری ہیں۔ Gulam Nabi Azad meets JK Leaders
سیاسی ماہرین کا کہنا ہے کہ غلام نبی آزاد کی جانب سے نئی پارٹی تشکیل دینے سے جموں وکشمیر کی مقامی سیاسی پارٹیوں کے اندر بھی بھونچال آنے کا امکان نظر آرہا ہے اور متعدد لیڈران اور سابق ممبران اسمبلی نے نئی پارٹی تشکیل دینے کا خیر مقدم کیا ہے۔ یو این آئی اردو کو معلوم ہوا ہے کہ جموں وکشمیر کے متعدد سابق ممبران اسمبلی اور سینئر لیڈران ہنگامی بنیادوں پر آزاد صاحب کی نئی دہلی رہائش گاہ پر پہنچے اور اُنہیں مبارکباد دی ۔
ذرائع نے بتایا کہ نئی دہلی میں دن بھر غلام نبی آزاد کی رہائش گاہ پر جموں وکشمیر کے سینئر لیڈران کا تانتا بندھا رہا جس سے یہ صاف ظاہر ہورہا ہے کہ غلام نبی آزاد کی پارٹی میں مقامی لیڈران کی ایک بڑی تعداد شمولیت اختیار کرنے کے بارے میں سوچ رہی ہے۔ ذرائع نے بتایا کہ نئی دہلی رہائش گاہ پر غلام نبی آزاد کے ساتھ ہفتے کے روز نو سابق ممبران اسمبلی سمیت متعدد لیڈران نے ملاقات کی۔
ذرائع کا کہنا ہے کہ کشمیر کی مین اسٹریم پارٹیوں کے کئی لیڈران نے غلام نبی آزاد کو فون پر مبارکباد دی ہے۔ ذرائع کے مطابق جموں وکشمیر میں اسمبلی چناو کے حوالے سے مرکزی اور ریاستی سطح پر تیاریاں زور و شور سے جاری ہیں لہذا غلام نبی آزاد نے جموں وکشمیر میں ہی اپنی نئی سیاسی پارٹی تشکیل دینے کا اعلان کیا۔
ذرائع کا کہنا ہے کہ غلام نبی آزاد کی جانب سے نئی سیاسی پارٹی تشکیل دینے کے بعد جموں وکشمیر کی مقامی سیاسی پارٹیوں میں بھی بھونچال آگیا ہے کیونکہ ان پارٹیوں کے سینئر لیڈران اور عہدیداروں کی جانب سے غلام نبی آزاد کی نئی سیاسی پارٹی میں شمولیت اختیار کرنے کا قوی امکان ہے۔ ذرائع نے کہاکہ غلام نبی آزاد کی نئی سیاسی پارٹی تشکیل دینے کے حوالے سے جموں وکشمیر میں سیاست تیز ہو گئی ہے۔
ذرائع کے مطابق خط پیر پنچال اور چناب میں غلام نبی آزاد کا دبدبہ ہے اور یہاں پر اُنہیں لوگ کافی عزت کی نظروں سے دیکھتے ہیں۔ باوثوق ذرائع کے مطابق آنے والے اسمبلی انتخابات کے دوران غلام نبی آزاد غیر معمولی اہمیت کے حامل لیڈر اُبھر کر سامنے آئیں گے۔ غلام نبی آزاد کے قریبی ساتھیوں میں شمار سابق ممبر اسمبلی غلام احمد سروڑی نے کہا کہ متعدد لیڈران اور سینئر کانگریس لیڈروں بشمول ڈی ڈی سی ، بی ڈی سی ممبران نے کانگریس پارٹی سے استعفیٰ دیا ہے۔انہوں نے کہاکہ غلام نبی آزاد کا کانگریس سے علیحدہ ہونا صحیح فیصلہ ہے۔
اُن کے مطابق غلام نبی آزاد چار ستمبر کو جموں پہنچ رہے ہیں اور وہ وہاں پر اپنے ساتھیوں اور متعد د سیاسی لیڈروں کے ساتھ نئی پارٹی تشکیل دینے کے حوالے سے غور وغوض کریں گے۔ کانگریس سے مستعفی ہوئے اور ایک سینئر لیڈرنے اپنا نام مخفی رکھنے کی شرط پر بتایا کہ جموں وکشمیر کا اگلا وزیر اعلیٰ غلا م نبی آزاد ہونگے۔ انہوں نے دعویٰ کیا کہ نیشنل کانفرنس، پی ڈی پی اور کانگریس کے کئی سینئر لیڈران آنے والے دنوں کے دوران غلام نبی آزاد کے خیمے میں شامل ہونگے اور اس حوالے سے مذکورہ لیڈران نے فون پر رابط بھی قائم کیا ہے۔
یہ بھی پڑھیں: Tariq Hameed Karra on Azad's Resignation آزاد نے بی جے پی کے مشن کیلئے استعفی دیا
یو این آئی
