نئی دہلی: سینٹرل بورڈ آف سیکنڈری ایجوکیشن کی جانب سے بارہویں جماعت کے نتائج کا اعلان کر دیا گیا ہے۔ رواں برس 39 لاکھ طلبا نے سی بی ایس ای بورڈ سے امتحانات دیے تھے جس میں 24 ہزار 68 طلبہ نے 95 فیصد سے زیادہ نمبر حاصل کیے ہیں۔ وہیں اگر بات کی جائے نتائج کی تو گزشتہ برس کے مقابلہ اس بار بارہویں جماعت کے نتائج میں بہتری آئی ہے۔ گزشتہ برس 87. 33 فیصد طلبا نے کامیابی حاصل کی تھی جب کہ رواں برس 87.98 فیصد طلبا نے کامیابی حاصل کی ہے۔
یہ بھی پڑھیں:
اسی سے متعلق ای ٹی وی بھارت کے نمائندے نے قومی دارالحکومت دہلی کے فصیل بند شہر کے چاندنی چوک میں واقع ایس کے وی سینیئر سیکنڈری چشمہ بلڈنگ اسکول کی طالبات سے بات کی۔ جنہوں نے اردو میڈیم اسکول میں بہتر نتائج حاصل کرکے اپنے والدین کے ساتھ ساتھ اسکول کا بھی نام روشن کیا۔ چشمہ بلڈنگ کے نام سے مشہور اس سرکاری اسکول میں اول مقام حاصل کرنے والی دانیہ ناز نے 88 فیصد نمبر حاصل کیے ہیں وہ مستقبل میں یونین پبلک سروس کمیشن کے امتحانات کی تیاری کرنا چاہتی ہیں۔
وہیں اسکول میں دوسرا مقام حاصل کرنے والی حسیبہ نور نے ہمارے گھر میں 86 اعشاریہ چھ فیصد نمبر حاصل کیے ہیں وہ مستقبل میں ایک ٹیچر بننے کی خواہاں ہیں۔ حسیبہ بتاتی ہیں کہ ان کے والد پڑھے لکھے نہیں ہیں۔ اس لیے ان کی خواہش ہے کہ وہ ایک ٹیچر بن کر ان بچوں کی تربیت کریں جو تعلیم کے زیور سے آراستہ ہونا چاہتے ہیں۔ جب کہ تیسرا مقام حاصل کرنے والی فریدہ نے 85.4 فیصد نمبر حاصل کیے ہیں، فریدہ نے مستقبل میں یو پی ایس سی کے امتحانات میں کامیابی حاصل کرنے کو اپنا مقصد بتایا ہے۔ ان کے مطابق وہ بچپن سے ہی سول سروسز کے امتحانات میں کامیابی حاصل کرنا چاہتی ہیں۔ انہوں نے بتایا کہ حجاب کسی بھی طرح سے ان کی تعلیم میں رکاوٹ پیدا نہیں کرتا بلکہ اس سے انہیں حوصلہ ملتا ہے جس کے ساتھ وہ آگے بڑھنا چاہتی ہیں۔
