مشرقی مدنی پور: مغربی بنگال میںلوک سبھا انتخابات میں چھٹے مرحلے کی ووٹنگ سے پہلے مشرقی مدنی پور ضلع کے نندی گرام میں تشدد کا بازار گرم ہو گیا ہے۔نندی گرام تھانہ کے سوناچورا علاقے میں تازہ ترین تشدد کے واقعات میں ایک خاتون کی موت ہوگئی جبکہ متعدد افراد کے زخمی ہونے کی اطلاع ہے۔
مغربی بنگال کے کانتھی اور تملوک سمیت آٹھ پارلیمانی حلقوں میں لوک سبھا انتخابات کے چھٹے مرحلے کےلئے ووٹ ڈالے جائیں گے۔اس سے صرف دو دن پہلے بی جے پی کے ایک کارکن کی ماہ کا گلا گھونٹ کر قتل کر دیا گیا تھا۔ الزام ہے کہ دیر رات موٹرسائیکل پر سوار چند نامعلوم شرپسندوں نے سوناچورا علاقے میں واقع گھروں پر حملہ کیا۔ اس حملے میں ایک خاتون کی موت ہو گئی۔ حادثے میں سات سے آٹھ افراد زخمی ہو گئے۔
مقامی ذرائع کے مطابق ہلاک ہونے والی خاتون کا نام راتھی بالا اڑی ہے۔ شرپسندوں کے ایک گروپ نے کل رات راتھی بالا اڑی کے گھر پر حملہ کیا۔بی جے پی کے کارکنان نے ترنمول کانگریس پر علاقے میں تشدد برپا کرنے کا الزام لگیا۔آج صبح سے ہی نندی گرام اور اس کے اطراف میں پرتشدد واقعات رونما ہوئے۔مقامی باشندوں نے سڑکوں پر ٹائر جلا کر ناکہ بندی کردی۔
مغربی بنگال کی پولیس اور مرکزی فورسز کی جانب سے حالات پر قابو پانے کی کوشش کی جا رہی ہے۔حزب اختلاف کے رہنما شبھندو ادھیکاری نے انتخابات سے دو دن قبل پرتشدد واقعات کے لئے حکمراں جماعت ترنمول کانگریس کو ذمہ دار ٹہرایا ہے۔
