کشتواڑ میں زلزلے کے جھٹکے، کوئی نقصان نہیں

کشتواڑ (جموں کشمیر) : جموں وکشمیر کے پہاڑی ضلع کشتواڑ میں منگل کی صبح زلزلے کے ہلکے جھٹکے محسوس کئے گئے تاہم کسی جانی یا مالی نقصان کی کوئی اطلاع نہیں ہے۔ ریکٹر اسکیل پر زلزلے کی شدت 3.7 ریکارڈ ہوئی ہے جبکہ اس کی زیر زمین گہرائی 5 کلو میٹر بتائی جا رہی ہے۔ گزشتہ شب بھی وادی کشمیر میں زلزلے کے جھٹکے محسوس کیے گئے جن کے سبب لوگوں میں خوف و ہراس پھیل گیا گیا۔

سینٹر فار سیسمالوجی کے مطابق پیر کی شب آئے زلزلے کی شدت ریختر پیمانہ پر 5.2 ناپی گئی، اس کا مرکز طول البلد 35.45 شمال میں اور طول البلد 74.93 مشرق میں واقع تھا۔ سرینگر اور وادی کشمیر کے دیگر حصوں میں چند سیکنڈ کے لیے زلزلے کے جھٹکے محسوس کیے گئے۔ جبکہ کشتواڑ ضلع میں منگل کی صبح 6 بجکر 36 منٹ پر زلزلے کے جھٹکے محسوس کئے گئے۔ تاہم ان زلزلوں سے کسی قسم کے جانی یا مالی نقصان کی کوئی اطلاع نہیں ہے۔

یاد رہے کہ جموں وکشمیر زلزلیاتی پیمانے پر سب سے زیادہ خطرناک زون پانچ اور چار میں آتا ہے۔ گزشتہ برس بھی ضلع کشتواڑ اور لداخ خطے میں دو درجن سے زائد زلزلوں کے جھٹکے محسوس کیے گئے تھے جن میں کوئی جانی نقصان رپورٹ نہیں ہوا، تاہم زلزلوں کے جھٹکوں سے لوگوں میں خوف و ہراس پھیل جاتا ہے، زلزلے کے جھٹکے لوگوں کو سنہ 2005کے خوفناک اور تباہ کن جھٹکوں کی یاد دلاتے ہیں جس میں کنٹرول لائن کے آر پار قریب 80ہزار لوگ فوت ہوئے تھے۔