دہرادون: اتراکھنڈ یونیفارم سول کوڈ (یو سی سی) بل کو صدر دروپدی مرمو سے منظوری مل گئی ہے۔ غور طلب ہو کہ اب قوانین بننے کے بعد اسے ریاست میں نافذ کیا جائے گا۔ وزیر اعلیٰ پشکر سنگھ دھامی نے خود اس کی تصدیق اپنے سوشل میڈیا پلیٹ فارم ایکس پر ایک پوسٹ کے ذریعے کی۔
وزیر اعلیٰ پشکر سنگھ دھامی نے ایکس پر ٹویٹ کرتے ہوئے لکھا کہ ریاست کے تمام لوگوں کے لیے یہ بڑی خوشی اور فخر کا لمحہ ہے کہ اتراکھنڈ اسمبلی سے پاس شدہ یونیفارم سول کوڈ بل کو صدر دروپدی مرمو نے منظوری دے دی ہے۔
انہوں نے مزید لکھا کہ یقینی طور پر ریاست میں یکساں سول کوڈ کے نفاذ سے تمام شہریوں کو مساوی حقوق حاصل ہوں گے اور خواتین پر ہونے والے ظلم پر روک لگے گی۔
یہ بھی پڑھیں:
- اتراکھنڈ اسمبلی میں یکساں سول کوڈ بل پیش
- مسلم تنظیمیں یو سی سی کے خلاف احتجاجاً اسمبلی کا گھیراؤ کریں گی
علاوہ ازیں وزیر اعلیٰ پشکر سنگھ دھامی نے کہا کہ یکساں سول کوڈ اتراکھنڈ میں سماجی مساوات کی اہمیت کو ثابت کرتے ہوئے ہم آہنگی کو فروغ دینے میں اہم کردار ادا کرے گا۔ وزیر اعظم مودی کے وژن کے مطابق اتراکھنڈ حکومت شہریوں کے مفادات کے تحفظ اور اتراکھنڈ کی اصل فطرت کو برقرار رکھنے کے لیے پرعزم ہے۔
