جھانجھر پور (بہار) مرکزی وزیر داخلہ امیت شاہ نے دعویٰ کیا کہ اگر غلطی سے بھی اپوزیشن ’انڈیا بلاک‘ (انتخابات میں) جیت درج کرتی ہے تو وزیر اعظم کے عہدے کے لیے اتحاد کے اعلیٰ رہنما آپس میں ہی دست و گریباں ہوں گے۔ ریاست بہار کے جھانجھر پور لوک سبھا حلقہ میں ایک ریلی سے خطاب کرتے ہوئے امیت شاہ نے دعوی کیا کہ ’’ایم کے اسٹالن، شرد پوار، لالو پرساد یادو اور ممتا بنرجی جیسے رہنما باری باری وزیر اعظم کے لیے ایک سال کے لیے راضی ہو سکتے ہیں اور راہل بابا (راہل گاندھی) کو جو کچھ (مدت) باقی رہتی ہے اس کو قبول کرنے ہی پڑے گا۔
اس صورتحال کے کے برعکس یعنی بی جے پی کی جیت کا حوالہ دیتے ہوئے شاہ نے کہا کہ ’’وزیر اعظم نریندر مودی کی تیسری مدت بہار سمیت پورے ملک سے بدعنوانی کے خاتمے اور ریاست میں ذات پات کے خاتمے کا باعث بنے گی۔‘‘ شاہ نے دعویٰ کیا کہ ’’مودی کی اقتدار میں واپسی یقینی ہے۔ لیکن، فرض کریں، غلطی سے بھی، اگر انڈیا اتحاد اقتدار میں آیا تو کیا ہوگا؟ کون بنے گا وزیر اعظم؟ کیا یہ اسٹالن، شرد پوار، ممتا بنرجی یا راہول گاندھی ہوں گے؟ وہ سب ایک ایک سال کے لیے ٹاپ پوسٹ شیئر کرنے پر راضی ہو جائیں گے۔ کیا اس طرح ملک چلایا جا سکتا ہے؟‘‘
نام لئے بغیر راہل گاندھی کو کمزور جبکہ مودی کو طاقتور قرار دیتے ہوئے بی جے پی کے سینئر رہنما نے زور دیکر کہا کہ ’’ہندوستان ایک مضبوط وزیر اعظم چاہتا ہے نہ کہ ایک کمزور وزیر اعظم۔‘‘ او بی سی (ریزرویشن) پر تشویش کا اظہار کرنے پر راہل گاندھی کی مذمت کرتے ہوئے وزیر داخلہ نے کہا کہ ’’کانگریس پارٹی ہمیشہ دیگر پسماندہ طبقات کے خلاف رہی ہے۔ اس نے منڈل کمیشن کی مخالفت کی تھی۔ مودی، او بی سی کے بیچ سے ابھر کر سامنے آئے ہیں اور ان کے دور میں اس کمیونٹی کو اتنا بااختیار بنایا گیا ہے جتنا وہ پہلے کبھی نہیں تھی۔‘‘
انہوں نے دفعہ 370 کی منسوخی اور دہشت گردی کے خلاف سرجیکل اسٹرائیکس جیسے اقدامات پر بھی مودی کی ستائش کی۔ مرکزی ایجنسیز کے غلط استعمال کا الزام عائد کرنے پر اپوزیشن کی سخت نکتہ چینی کرتے ہوئے شاہ نے کہا: ’’کیا بدعنوانوں کے خلاف کارروائی نہیں ہونی چاہیے؟ جو بھی ملک کی غریب عوام کے لیے مختص رقم کی چوری، غبن کرنے کا مرتکب پایا جائے گا اسے جیل میں ہونا چاہیے۔‘‘
یہ بھی پڑھیں: ملک میں ریزرویشن کو کبھی ختم نہیں ہونے دیا جائے گا: شاہ - lok sabha election 2024
