گیا: ضلع گیا کے مفصل تھانہ علاقہ میں واقع نیو پہاڑتلی آبگلہ میں دیر شام کو سماج دشمن عناصر کی طرف سے زبردست فائرنگ کی گئی ہے۔ جس میں ایک شخص کی موت ہو گئی اور دوسرا زخمی ہو گیا۔ زخمی نوجوان محبوب کا مگدھ میڈیکل کالج اسپتال میں علاج چل رہا ہے، فائرنگ میں ہلاک ہونے والے بزرگ کی شناخت صلاح الدین انصاری کے طور پر ہوئی ہے۔ اطلاع کے مطابق موقع پر ڈی ایم ڈاکٹر تیاگ راجن، ایس ایس پی آشیش بھارتی اور پولس انتظامیہ کے افسران اور جوان جائے وقوع پر کیمپ کیے ہوئے ہیں۔
یہ بھی پڑھیں:
چیف سکریٹری یکم جون کو ایئر پورٹ گیا پر حج تیاریوں کا لیں گے جائزہ - Haj Preparation At Gaya
واقعہ کی اطلاع ملتے ہی بڑی تعداد میں پولیس موقع پر پہنچ گئی اور حالات کو قابو میں کیا۔ چار روز قبل ایک نوجوان کا موبائل چھین لیا گیا تھا۔ جس پر مخصوص برادری کے لوگوں نے اڈے پر 4 نوجوانوں سے مارپیٹ کی تھی۔ جس کے بعد بدھ کی شام تقریباً سات بجے رام نگر روڈ نمبر 1 اور مسجد گلی میں تین درجن سے زائد لڑکے داخل ہوئے۔ اور اندھا دھند فائرنگ شروع کر دی۔ اس دوران ایک اسکارپیو کو نقصان بھی پہنچایا گیا۔
عینی شاہدین نے بتایا کہ حملہ آوروں نے ایک کے بعد ایک گولیاں چلائی ہیں۔ اطلاع کے مطابق متوفی صلاح الدین انصاری نماز کے لیے جا رہے تھے، تبھی اچانک ہوئے حملہ سے وہ بھاگ نہیں سکے۔ حالانکہ اس دوران انہوں نے کوشش کی کہ ان لوگوں کو سمجھا بجھا کر پرسکون کرایا جائے لیکن اسی دوران انہیں سامنے سے گولی مار دی گئی۔ جب کہ ایک نوجوان جس کے پاؤں میں گولی لگی ہے وہ اسپتال میں زیر علاج ہے۔ تاہم خطرے سے باہر بتایا جا رہا ہے۔
اس حوالے سے ایس ایس پی آشیش بھارتی نے بتایا کہ تنازعہ دو تین دن پہلے کسی بات کو لے کر ہوا تھا، لیکن پھر دونوں طرف کے لوگوں نے جن کے درمیان تنازعہ ہوا تھا اُنہوں نے آپس میں معاملہ کو حل کر لیا تھا۔ پولیس کو اس کی خبر نہیں تھی۔ انہوں نے کہا کہ سماج دشمن عناصر نے اس واردات کو انجام دیا ہے۔ فی الحال حالات قابو میں ہیں اور احتیاط کے طور پر وہاں پولیس جوانوں کی تعیناتی کر دی گئی ہے۔ کسی بھی قصوروار کو بخشا نہیں جائے گا۔ ضروری کارروائی یقینی طور پر ہوگی، چھاپہ ماری کی جا رہی ہے۔
انہوں نے کہا کہ زخمی نوجوان کی حالت مستحکم ہے، ایک شخص کی موت ہوئی ہے۔ ساتھ ہی انہوں نے لوگوں سے اپیل کی کہ وہ کسی بھی افواہ میں نہ آئیں۔ پولیس منصفانہ کارروائی میں مصروف ہے۔ یہاں اے ڈی ایم لاء اینڈ آرڈر، صدر ایس ڈی کشلے شریواستو، ڈی ایس پی سنیل کمار پانڈے، بی ڈی او ڈاکٹر مرتونجے کمار، سی او سبودھ کمار، محمد سہیل، محمد ظفر، ڈاکٹر امین سمیت مقامی لوگوں کی بڑی تعداد موقع پر موجود تھی اور سبھی ماحول کو پرسکون کرانے میں لگے تھے۔
