9 Crore Cyber Fraud In Karimnagar : తక్కువ ధరలకే ఎలక్ట్రానిక్ వస్తువులు, బంగారం ఇప్పిస్తానని చెప్పి.. ఆన్లైన్ మోసాలకు పాల్పడుతున్న ఘరానా మోసగాడిని రాజన్న సిరిసిల్ల పోలీసులు అరెస్టు చేశారు. పలువురి వద్ద నుంచి రూ.9 కోట్ల మేరకు డబ్బులు తీసుకొని మోసాలకు పాల్పడ్డాడు. అతడిని అరెస్ట్ చేసిన పోలీసులు రిమాండ్కు తరలించారు. మోసాలకు సంబంధించిన పూర్తి వివరాలను సిరిసిల్ల ఎస్పీ అఖిల్ మహాజన్ వివరించారు.
ఎస్పీ అఖిల్ మహాజన్ తెలిపిన వివరాల ప్రకారం.. పెద్దపల్లి జిల్లా ధర్మారం మండలం మల్లాపూర్ గ్రామానికి చెందిన కట్టుకోజుల రమేశ్ అలియాస్ రమేశ్ చారి అనే వ్యక్తి.. ప్రైవేట్ టీచర్గా ఉద్యోగం చేసేవాడు. ఆ ఉద్యోగం మానేసి.. ఫుడ్ ప్రాసెసింగ్ వర్క్ చేస్తూ జీవనం సాగించేవాడు. ఈ ఉద్యోగం చేయడం వల్ల తక్కువ డబ్బులు రావడంతో సరిపోక.. ఎలాగైన సులువుగా డబ్బులు సంపాదించాలనే ఉద్దేశంతో ఆన్లైన్లో వస్తువులు తక్కువ రేటుకు కొనేవాడు. ఆ తర్వాత వాటిని తన ఫేస్బుక్, సోషల్ మీడియా వేదికల్లో అతితక్కువ ధరకే ఇస్తానని చెప్పి పోస్టులు పెట్టేవాడు. అది చూసి చాలామంది అతనికి ఫోన్ చేసి.. వస్తువులు కొనేవారు. అలా రమేశ్ చారికి డెలివరీ ఖర్చుల డబ్బులు వచ్చేవని తెలిపారు.
Online Fraud Through Facebook : ఇలా అధిక మొత్తంలో డబ్బులు రావడం చూసి.. ఎలాగైనా తానే ఒక మార్కెటింగ్ వెబ్సైట్ ఏర్పాటు చేసుకోవాలని నిర్ణయించుకున్నాడు. ఇలా మొదటగా మోసాలు మొదలు పెట్టడం ప్రారంభించాడు. ఫేస్బుక్లో rameshchary అనే ఐడీని ఏర్పాటు చేసుకొని.. తన నంబర్లను లింక్ చేశాడు. అలా ఆన్లైన్ ఆఫర్ ద్వారా వచ్చిన వస్తువులు కొనుగోలు చేసి.. తక్కువ ధరకు మార్కెటింగ్ యాడ్ ఇచ్చేవాడు. ఇలా చాలా మందిని నమ్మించి అధిక మొత్తంలో డబ్బులు వసూలు చేశాడు. మొదటగా ప్రోడక్టు ఆర్డర్ చేస్తే.. వారు డబ్బులను తన ఖాతాలో జమ చేస్తేనే వస్తువులు డెలివరీ ఇచ్చేవాడు.
Online Fraud By Goods Are Cheap : ఇలా 14 నెలలు నుంచి అధిక మొత్తంలో డబ్బులు వసూలు చేసి.. కొద్ది మందికి మాత్రమే డెలివరీ చేశాడని ఎస్పీ అఖిల్ మహాజన్ చెప్పారు. ఆర్డర్ లేట్ అవుతుందని కస్టమర్లు అడిగితే.. కొంచెం సమయం వేచి ఉండాలని నమ్మించసాగేవాడు. ఇంకా తాను గోల్డ్ స్మిత్నని నమ్మించి.. తక్కువ ధరకే తనవద్ద బంగారం వస్తుందని చెప్పి.. మోసం చేసేవాడు. ఇలా అందరి నుంచి రూ.9 కోట్లను స్వాహా చేశాడు. ఈ మోసాలన్నీ హైదరాబాద్ కేంద్రంగా సాగేవని తెలిపారు. ఆ డబ్బులన్నీ అయిపోయాక.. ముస్తాబాద్ ప్రాంతానికి చెందిన కస్టమర్ను నమ్మించేందుకు ప్రయత్నించాడు. అతనికి అనుమానం వచ్చి పోలీసులకు ఫిర్యాదు చేశాడు.
19 కేసుల్లో నిందితుడు : పోలీసులు స్పెషల్ టీమ్ ఏర్పాటు చేసి దర్యాప్తు చేపట్టగా.. రమేశ్ చారి మోసాలు ఒక్కొక్కటిగా బయటపడ్డాయి. రాజన్న సిరిసిల్ల, కరీంనగర్, జగిత్యాల, సిద్దిపేట జిల్లాల్లో అంతకు ముందు 19 కేసులు నమోదయ్యాయని దర్యాప్తులో తేలింది. గతంలో ఉద్యోగం ఇప్పిస్తానని చెప్పి.. మోసం చేసిన కేసులో నిందితునిపై పీడీ యాక్ట్ నమోదు చేశారు. ఇప్పుడు అతనిని రాజన్న సిరిసిల్ల పోలీసులు అరెస్టు చేశారు. తక్కువ ధరకే వస్తువులు వస్తాయన్న ప్రకటనలు చూసి ఇలా మోసపోకుండా జాగ్రత్తగా ఉండాలని పోలీసులు తెలుపుతున్నారు.
ఇవీ చదవండి :
