Jagtial Rural SI Anil Controversy : జగిత్యాలలో వీహెచ్​పీ బంద్.. తనకు సంబంధం లేదన్న ఎస్సై

Jagtial Rural SI Anil Controversy : ఆర్టీసీ బస్సులో సీటు కోసం ఇద్దరు మహిళ మధ్య వచ్చిన గొడవ.. చినిచినికి గాలివానలా మారింది. బస్​సీటు విషయంలో తన భార్యతో గొడవపడిందన కారణంతో.. యువతితో దురుసుగా ప్రవర్తించాడంటూ జగిత్యాల రూరల్ ఎస్సై అనిల్​ను ఉన్నతాధికారులు సస్పెండ్ చేశారు. ఈ చర్యకు నిరసనగా జగిత్యాల పట్టణంలో విశ్వహిందూ పరిషత్‌ ఆధ్వర్యంలో శనివారం రోజు బంద్​కు పిలుపునిచ్చింది. విశ్వహిందూ పరిషత్ కార్యకర్తలు జగిత్యాల బస్​ డిపో ముందు బైఠాయించి.. బస్సులు బయటకు వెళ్లకుండా అడ్డుకున్నారు.

మరోవైపు ఎస్సై వర్గానికి చెందిన గొల్లకుర్మ యాదవుల ఐక్యవేదిక జాతీయ అధికార ప్రతినిధి కొక్కు దేవేందర్‌ జగిత్యాల పట్టణంలో పర్యటించారు. ఆకారణంగా ఎస్సైపై చర్యలు తీసుకున్నారని.. పోలీసు ఉన్నతాధికారులు తక్షణమే ఆయన సస్పెన్షన్ ఆర్డర్​ను వెనుకకు తీసుకోవాలని డిమాండ్ చేశారు. జగిత్యాల పట్టణ బంద్​ సందర్భంగా.. పోలీసులు భద్రత ఏర్పాటు చేశారు.

బంద్​తో నాకు సంబంధం లేదు.. జగిత్యాల పట్టణ బంద్​పై.. సస్పెన్షన్​కు గురైన ఎస్సై అనిల్ స్పందించారు. తనకు, జగిత్యాల పట్టణబంద్​కు ఎటువంటి సంబంధం లేదన్నారు. కొందరు రాజకీయ పార్టీల వారు, కొన్ని వర్గాల వారు తమ స్వలాభం కోసం ఉద్దేశపూర్వకంగానే బంద్​కు పిలుపునిచ్చాయని ఆరోపించారు. సామాజికమాధ్యమాల్లో విస్తృతంగా ప్రచారం చేస్తున్నారన్నారు. చట్టంపై, పోలీస్​ ఉన్నతాధికారులపై తనకు నమ్మకం ఉందని ఆయన స్పష్టం చేశారు. తనపై విధించిన సస్పెన్షన్​ వ్యవహారాన్ని డిపార్ట్​మెంట్​ నిబంధనల ప్రకారం పరిష్కరించుకుంటానని తెలిపారు. తన పేరుతో బంద్​ ప్రకటించి పట్టణ ప్రజలను ఇబ్బందులకు గురిచేయడం సమంజసం కాదన్నారు.

అసలేం జరిగిందంటే.. కరీంనగర్‌ నుంచి జగిత్యాల వస్తున్న ఆర్టీసీ బస్సులో.. జగిత్యాల రూరల్‌ ఎస్సై అనిల్‌ భార్య, ఓ యవతికి సీటు విషయంలో గొడవ జరిగింది. గొడవను తెలుసుకున్న ఎస్సై.. ఆర్టీసీ బస్సును జగిత్యాలలో ఆపి సదరు యువతిని కోట్టాడని యువతి తరపువారు ఆందోళన చేశారు. ఈ విషయం పైఅధికారుల వరకు వెల్లడంతో ఎస్సైపై విచారణ జరిపి.. మూడు రోజుల క్రితం ఎస్సై అనిల్‌ను సస్పెండ్‌ చేయటంతో పాటు.. అతనిపై కేసు నమోదు చేశారు.

"జగిత్యాల పట్టణ బంద్​కు.. నాకు సంబంధం లేదు. కొందరు రాజకీయ పార్టీల వారు, కొన్ని వర్గాల వారు తమ స్వలాభం కోసం ఉద్దేశపూర్వకంగానే బంద్​కు పిలుపునిచ్చాయి. సామాజికమాధ్యమాల్లో విస్తృతంగా ప్రచారం చేస్తున్నారన్నారు. చట్టంపై, పోలీస్​ ఉన్నతాధికారులపై నాకు నమ్మకం ఉంది. నాపై విధించిన సస్పెన్షన్​ వ్యవహారాన్ని డిపార్ట్​మెంట్​ నిబంధనల ప్రకారం పరిష్కరించుకుంటాను". - అనిల్​, సస్పెన్షన్​కు గురైన ఎస్సై

ఇవీ చదవండి: