Jaggareddy: కాంగ్రెస్కు రాజీనామాను వాయిదా వేసుకుంటున్నట్లు సంగారెడ్డి ఎమ్మెల్యే జగ్గారెడ్డి వెల్లడించారు. 15 రోజులు వేచి చూసి రాజీనామాపై నిర్ణయం తీసుకుంటానని ఆయన స్పష్టం చేశారు. పీసీసీ అధ్యక్షుడు సమస్య మూలాలను తెలుసుకోవట్లేదని మండిపడ్డారు. టీ కప్పులో తుపాను అంటూ తేలిగ్గా కొట్టి పారేస్తున్నారన్నారు. అసలు సమస్య ఎందుకు వచ్చిందో ఆలోచించట్లేదని ధ్వజమెత్తారు. పార్టీలోని కొందరు నేతలు తనకు సర్దిచెప్తున్నారన్నారు. సోనియా, రాహుల్‌ను కలిస్తే సమస్య పరిష్కారం అవుతుందేమోనని అన్నారు. పార్టీలో సమస్యల గురించి 15 రోజులు మాట్లాడనన్నారు. పులి లాంటి నేను ఎలుకలతో పోట్లాడనని వెల్లడించారు. పీసీసీ అధ్యక్షుడు వచ్చి కలిసినా పార్టీలో ఉండే పరిస్థితి లేదన్నారు. తన సమస్య మాణిక్యం ఠాగూర్, రేవంత్‌తో పరిష్కారం అవుతుందన్నారు.
కేసీఆర్ మహారాష్ట్ర పర్యటనపై జగ్గారెడ్డి వ్యాఖ్యలు చేశారు. తెరాస-భాజపాల మధ్య చీకటి ఒప్పందం ఉందనే ఆరోపణల నుంచి బయటపడేందుకు కేసీఆర్ యత్నిస్తున్నారని ఆయన అన్నారు. అందుకోసమే మహారాష్ట్ర సీఎం, ఎన్సీపీ అధినేత శరద్ పవార్లను కలిసేందుకు వెళ్లారన్నారు.
‘పీసీసీ అధ్యక్షుడు సమస్య మూలాలను తెలుసుకోవట్లేదు. టీ కప్పులో తుపాను అంటూ తేలిగ్గా కొట్టి పారేస్తున్నారు. అసలు సమస్య ఎందుకు వచ్చిందో ఆలోచించట్లేదు. పార్టీలోని కొందరు నేతలు రెండ్రోజులుగా నాకు సర్ది చెబుతున్నారు. నా మీద దుష్ప్రచారం జరుగుతోంది. సోనియా గాంధీ, రాహుల్‌ గాంధీలను కలిస్తే నా సమస్యకు దొరుకుతుందని అనుకుంటున్నా. దిల్లీ అపాయింట్‌మెంట్‌ కోసం మా సీనియర్లు ప్రయత్నం చేస్తున్నారు. అవకాశం వస్తే వెళ్లి కలుస్తా. పార్టీలో సమస్యల గురించి 15 రోజులు మాట్లాడాను. మా పెద్దల మాటలను గౌరవించి మాట్లాడకూడదని నిర్ణయించుకున్నాను. జగ్గారెడ్డి సమస్య కుటుంబ సమస్య అని పీసీసీ అనడం సహజం. నేను ఆట ప్రారంభించా.. వేచి చూడాలి. నా వెనుక ఎవరూ లేరు. పీసీసీ అధ్యక్షుడు వచ్చి కలిసినా పార్టీలో ఉండే పరిస్థితి లేదు. పులి లాంటి నేను ఎలుకలతో పోట్లాడను’
-జగ్గారెడ్డి, సంగారెడ్డి ఎమ్మెల్యే
ఇదీ చదవండి:
