Committee on KMC student's suicide attempt : వరంగల్లోని పీజీ వైద్య విద్యార్థిని ఆత్మహత్యాయత్నంపై కమిటీని ఏర్పాటు చేశారు. నలుగురు ప్రొఫెసర్లతో కూడిన కమిటీనీ ఎంజీఎం సూపరింటెండెంట్ చంద్రశేఖర్ నియమించారు. ఈ కమిటీ ఆత్మహత్యాయత్నానికి గల కారణాలను విశ్లేషించనుంది. కమిటీ ఇచ్చిన రిపోర్టును సీల్డ్ కవర్లో పెట్టి.. డీఎంఈకి ఇవ్వనున్నారు.
విద్యార్థిని ఆరోగ్యంపై ఆరా తీసిన డీఎంఈ: కేఎంసీలో ఎటువంటి ర్యాగింగ్ జరగలేదని.. తెలంగాణ వైద్యవిద్యా సంచాలకులు రమేశ్ రెడ్డి స్పష్టం చేశారు. హైదరాబాద్లోని నిమ్స్లో విద్యార్థిని ఆరోగ్య పరిస్థితిపై ఆరా తీసిన ఆయన.. వైద్యులను వివరాలు అడిగి తెలుసుకున్నారు. విద్యార్థిని ఆరోగ్య పరిస్థితి విషమంగానే ఉందని.. వెంటిలేటర్పై చికిత్స కొనసాగుతుందని తెలిపారు. అప్పుడప్పుడు కళ్లు తెరుస్తోందని చెప్పారు. ఈ ఘటన జరిగిన వెంటనే ఆమెను నిమ్స్ వైద్యబృందంతో మాట్లాడి.. ఇక్కడి ఆస్పత్రిలో చేర్పించామని వెల్లడించారు.
వైద్యవిద్యార్థిని వైద్యానికి సంబంధించి ప్రభుత్వం అన్ని సహకారాలు అందిస్తోందని రమేశ్ రెడ్డి తెలిపారు. విద్యార్థిని ఇంజక్షన్ తీసుకున్నట్లు ఒంటిమీద ఎక్కడా ఆనవాళ్లు లేవని నిమ్స్ వైద్యులు తెలిపారని చెప్పారు. అవసరమైతే ఎక్మో ట్రీట్మెంట్కు కూడా సిద్ధమన్నారు. పీజీ స్థాయిలో అసలు ర్యాగింగ్ అనేది ఉండదని రమేశ్ రెడ్డి స్పష్టం చేశారు. ఈ ఘటనపై ఇప్పటికే కమిటీని ఏర్పాటు చేశామని.. ఆ నివేదిక వచ్చిన తర్వాతనే తదుపరి చర్యలు తీసుకుంటామని చెప్పారు. ఆమె ప్రాణాలు కాపాడేందుకు నిమ్స్ వైద్యులు అన్ని విధాలుగా ప్రయత్నిస్తున్నారని వివరించారు.
"ర్యాగింగ్ అనేది పీజీ స్థాయిలో ఉండదు. ఎంబీబీఎస్ మొదటి రెండేళ్లలో ర్యాగింగ్ ఉంటే ఉండొచ్చు. వర్క్‌లోడ్ ఎక్కువ వల్ల ఈ విద్యార్థినికి గట్టిగా చెప్పానని సీనియర్ డాక్టర్ చెప్పారు. రెండు రోజుల క్రితం ఇద్దరికీ కౌన్సిలింగ్ ఇచ్చాం. కౌన్సిలింగ్ తర్వాత మళ్లీ ఇద్దరూ ఒకే ప్రాంతంలో పని చేయలేదు. ప్రతి జూనియర్ రాగానే సీనియర్ ఏవిధంగా చెబుతారో ఇక్కడా కూడా అదే జరిగింది. కానీ ఆమె విషయంలో కొంచెం ఇబ్బందికరంగా జరిగినట్లు ఉంది." - రమేశ్ రెడ్డి, డీఎంఈ
ఇవీ చదవండి:
