Australian Open: స్పెయిన్ బుల్ రఫెల్ నాదల్ ఆస్ట్రేలియన్ ఓపెన్ రెండో రౌండ్లోకి దూసుకెళ్లాడు. 109 నిమిషాల పాటు సాగిన పోరులో అమెరికాకు చెందిన మార్కస్ గిరాన్ను 6-1, 6-4, 6-2 తేడాతో ఓడించాడు. ఫలితంగా ఆస్ట్రేలియన్ ఓపెన్లో 70వ విజయం నమోదు చేసి రికార్డు సృష్టించాడు. రెండో రౌండ్లో జర్మనీ ఆటగాడు యన్నిక్ హాన్ఫ్మన్ లేదా ఆస్ట్రేలియా ప్లేయర్ తనాసి కొక్కినాకిస్లో ఒకరితో తలపడనున్నాడు.
అంతకుముందు తొలిసారి గ్రాండ్ స్లామ్ సీడ్ సాధించిన కార్లోస్ అల్కరాజ్.. చిలీ ఆటగాడు అలెజాండో తబిలోను 6-2, 6-2, 6-3 తేడాతో ఓడించాడు.
స్వదేశం చేరుకున్న జకోవిచ్..
వ్యాక్సిన్ తీసుకోని కారణంగా ఆస్ట్రేలియన్ ఓపెన్లో పాల్గొనేందుకు అనుమతి పొందలేకపోయిన టెన్నిస్ దిగ్గజం, ఢిపెండింగ్ ఛాంపియన్ నొవాక్ జకోవిచ్ స్వదేశం చేరుకున్నాడు. ఆసీస్ నుంచి అతడు దుబాయ్ మీదుగా విమానంలో సెర్బియా రాజధాని బెల్గ్రేడ్కు వెళ్లాడు. ఎన్నో నాటకీయ పరిణామాలు, న్యాయపోరాటం తర్వాత అతడు ఆస్ట్రేలియన్ ఓపెన్లో పాల్గొనకుండా వెనుదిరగాల్సి వచ్చింది. టీకా తీసుకోని వారిని టోర్నీలో ఆడనివ్వమని ఆస్ట్రేలియా ప్రభుత్వం తేల్చిచెప్పింది.
ఫ్రెంచ్ ఓపెన్కూ దూరం!
జకోవిచ్కు మరో షాక్ కూడా తగిలే సూచనలు కన్పిస్తున్నాయి. వ్యాక్సిన్ తీసుకోకపోవడం వల్ల అతడు ఫ్రెంచ్ ఓపెన్లో పాల్గొనడంపైనా నీలినీడలు కమ్ముకున్నాయి. టీకా తీసుకోకపోతే జకోవిచ్ను టోర్నిలో ఆడనివ్వబోమని ఫ్రెంచ్ క్రీడా మంత్రిత్వ శాఖ స్పష్టం చేసినట్లు రాయిటర్స్ వార్త సంస్థ వెల్లడించింది. దీంతో అతడు ఈ టోర్నీకి కూడా దూరమయ్యే అవకాశం ఉంది.
ఇదీ చదవండి: కెప్టెన్సీ అప్పగిస్తే గొప్ప గౌరవంగా భావిస్తా: బుమ్రా
