Rohit sharma: వెస్టిండీస్తో మూడు వన్డేల సిరీస్ క్లీన్స్వీప్పై భారత్ కన్నేసింది. చివరిదైన మూడో వన్డే అహ్మదాబాద్లోని నరేంద్ర మోదీ స్టేడియంలో శుక్రవారం జరగనుంది. రోహిత్ శర్మ కెప్టెన్గా బాధ్యతలు చేపట్టాక జరుగుతున్న ఈ సిరీస్ను 2-0 తేడాతో ఇప్పటికే మన జట్టు కైవసం చేసుకుంది. చివరి మ్యాచ్లోనూ గెలిచి క్లీన్స్వీప్ చేయాలని చూస్తోంది.
భారత్.. ఒకవేళ ఈ సిరీస్ క్లీన్స్వీప్ చేస్తే.. దాదాపు ఐదేళ్ల తర్వాత ఈ ఘనత నమోదు చేసినట్లవుతుంది. చివరగా 2017లో విరాట్ కోహ్లీ కెప్టెన్సీలో శ్రీలంకను వైట్వాష్ చేసింది టీమ్ఇండియా. ఈ సిరీస్ను క్లీన్స్వీప్ చేస్తే వన్డేల్లో వెస్టిండీస్పై మెుదటి క్లీన్స్వీప్ అవుతుంది.
Team india ODI: ఇప్పటివరకు టీమ్ఇండియా.. వన్డేల్లో 11సార్లు క్లీన్స్వీప్లు చేసింది. దిగ్గజ ఆటగాడు కపిల్ దేవ్ మెుదటిసారి ఈ ఘనత సాధించాడు. ధోనీ, కపిల్ మాత్రమే దీనిని మూడుసార్లు నమోదు చేశారు.
భారత తరఫున కపిల్, దిలీప్ వెంగ్సర్కార్, అజారుద్దీన్, ధోనీ, గంభీర్, కోహ్లీ,రహానె కెప్టెన్లుగా వన్డే క్లీన్స్వీప్లు చేశారు. చివరి వన్డేలో ఇండియా, వెస్టిండీస్ను ఓడిస్తే ఈ ఘనత సాధించిన ఎనిమిదో కెప్టెన్గా రోహిత్ రికార్డు సృష్టిస్తాడు. అయితే ఈ జాబితాలో 20 వన్డే క్లీన్స్వీప్లతో పాకిస్థాన్, దక్షిణాఫ్రికా జట్లు ముందున్నాయి.
రికార్డుకు సిక్స్ దూరంలో రోహిత్..
భారత కెప్టెన్ రోహిత్ శర్మ మరో రికార్డుపై కన్నేశాడు. ఈ వన్డేలో ఓ సిక్స్ కొడితే మాజీ కెప్టెన్ ధోనీ రికార్డును అధిగమిస్తాడు. భారత్ తరఫున వన్డేల్లో ఎక్కువ సిక్సర్లు కొట్టిన బ్యాటర్గా నిలుస్తాడు. ప్రస్తుతం వీరిద్దరూ 116 సిక్సర్లతో సమంగా ఉన్నారు. ధోనీ 113 ఇన్నింగ్స్లో కొట్టగా.. రోహిత్ 68 ఇన్నింగ్స్లోనే ఈ మార్క్ను అందుకోనుండటం విశేషం.
విండీస్తో వన్డే సిరీస్లో భారత బౌలర్లు కీలక పాత్ర పోషించారు. తొలి మ్యాచ్లో 176 పరుగులకే వెస్టిండీస్ను కట్టడి చేయగా, రెండో వన్డేలో ప్రత్యర్థి జట్టును 193కే ఆలౌట్ చేశారు. తద్వారా రెండు మ్యాచ్ల్లో టీమ్ఇండియా విజయం సాధించింది. సిరీస్ను కూడా సొంతం చేసుకుంది.
ఇదీ చదవండి: ఐపీఎల్ వేలం.. చెన్నై, ముంబయి జట్లకు స్పెషల్ టాలెంట్
