IPL 2022: ఐపీఎల్ 15వ సీజన్ త్వరలోనే ప్రారంభించేందుకు బీసీసీఐ సన్నాహాలు చేస్తోంది. అయితే.. ఐపీఎల్ చివరి దశ మ్యాచ్లకు ఇంగ్లాండ్ టెస్టు జట్టుకు చెందిన ఆటగాళ్లు దూరం కానున్నట్లు తెలుస్తోంది. సొంతగడ్డపై న్యూజిలాండ్తో సిరీస్ నేపథ్యంలో.. తమ ఆటగాళ్లను ఇంగ్లాండ్ క్రికెట్ బోర్డు (ఈసీబీ) వెనక్కి రప్పించే అవకాశాలు ఉన్నాయనే వార్తలు జోరుగా వినిపిస్తున్నాయి.
మార్చి 27 నుంచి మే చివరి వరకు ఐపీఎల్ టోర్నీ నిర్వహించాలని బీసీసీఐ భావిస్తోంది. మొత్తంగా పది జట్లు 64 మ్యాచ్లు ఆడనున్నాయి. ఈ నిర్ణీత వ్యవధిలోనే ఐపీఎల్ జరిగితే.. ఇంగ్లాండ్ టెస్టు జట్టు ఆటగాళ్లు ప్లే ఆఫ్స్ సమయంలోనే సొంతగడ్డకు బయలుదేరే అవకాశముంది. టెస్టు ఛాంపియన్షిప్ ప్రాధాన్యత దృష్ట్యా ఆటగాళ్లను ఈసీబీ వెనక్కిరప్పించే అవకాశాలు ఎక్కువగా ఉన్నాయి. జూన్ 2 నుంచే ఇంగ్లాండ్, న్యూజిలాండ్ మధ్య సిరీస్ ప్రారంభంకానుంది. అయితే.. ఈసీబీ తీరుపై అభిమానులు ఆగ్రహం వ్యక్తం చేస్తున్నారు. 'ఫ్రాంఛైజీలు చాలా డబ్బు వెచ్చించి ఆటగాళ్లను తీసుకుంటాయి. ఇలా సగంలో వదిలేసి వెళ్తే ఎలా?' అని కొందరు మండిపడుతున్నారు.
మరోవైపు.. ఇంగ్లాండ్ ఆటగాళ్లు మాత్రం ముందుగానే వేలం కోసం తమ పేర్లను రిజిస్టర్ చేసుకున్నారు. మొత్తంగా 22 మంది వేలంలో పాల్గొంటున్నారు. టెస్టు జట్టు సభ్యులైన జానీ బెయిర్స్టో, మార్క్ వుడ్, డేవిడ్ మలన్, ఒలీ పోప్, ఓవర్టన్, సామ్ బిల్లింగ్స్, డాన్ లారెన్స్ ఈ జాబితాలో ఉన్నారు. కాగా, జాస్ బట్లర్ను రాజస్థాన్ జట్టు రిటైన్ చేసుకుంది. బెన్ స్టోక్స్, ఆర్చర్ మాత్రం వేలంలో పాల్గొనడం లేదు.
సంబంధం కోసం వెతుకుతున్నారా? తెలుగు మాట్రిమోని లో రిజిస్ట్రేషన్ ఉచితం!
ఇదీ చదవండి:
