పాకిస్థాన్ పర్యటన నుంచి తప్పుకొని పీసీబీకి షాకిచ్చింది న్యూజిలాండ్ క్రికెట్ బోర్డు(pak nz 2021). భద్రత కారణాల దృష్ట్యా వైదొలుగుతున్నట్లు ప్రకటించింది. ఆ తర్వాత పాక్తో సిరీస్ను ఇంగ్లాండ్(pak eng series) కూడా రద్దు చేసుకుంది. దానికి సంబంధించిన కారణాలు సరిగా వెల్లడించకపోయినా ఆటగాళ్ల సంక్షేమమే ముఖ్యమని తెలిపింది. దీనిపై అసంతృప్తి వ్యక్తం చేసిన పీసీబీ ఈ నిర్ణయం తమని బాధించిందని వెల్లడించింది. ఇంగ్లాండ్ బోర్డు ఏకపక్షంగా నిర్ణయం తీసుకుందని ఆరోపించింది. తాజాగా ఈ విషయంపై స్పందించారు ఈసీబీ చీఫ్ ఇయాన్ వాట్మోర్. పర్యటనను దూరం చేసుకున్నందుకు క్షమాపణలు చెప్పారు.
"మా నిర్ణయంతో ఎవరైనా బాధపడితే క్షమాపణలు చెబుతున్నా. మా ఆటగాళ్ల మానసిక, ఆరోగ్య సంక్షేమాన్ని దృష్టిలో పెట్టుకునే ఈ నిర్ణయం తీసుకున్నాం. వచ్చే ఏడాది పాకిస్థాన్లో పర్యటించడానికి సిద్ధంగా ఉన్నాం. దానికి సంబంధించిన ప్రణాళికల్ని రూపొందిస్తాం."
-ఇయాన్ వాట్మోర్, ఈసీబీ చీఫ్
ఈసీబీ చీఫ్ నిర్ణయంపై హర్షం వ్యక్తం చేశారు పాకిస్థాన్ సమాచార, బ్రాడ్కాస్టింగ్ శాఖ మంత్రి ఫవాద్ చౌదరి. "వచ్చే ఏడాది పాకిస్థాన్లో పర్యటిస్తానన్న ఈసీబీ నిర్ణయం ఆహ్వానించదగింది. ఈ సిరీస్ కోసం కృషి చేసిన ప్రతి ఒక్కరికి ధన్యవాదాలు" అని వెల్లడించారు.
అక్టోబర్లో పాకిస్థాన్ పర్యటనకు వెళ్లాల్సి ఉంది ఇంగ్లాండ్ మహిళా, పురుషుల జట్లు. టీ20 ప్రపంచకప్నకు ముందు పురుషుల జట్ల మధ్య రెండు టీ20లు, మహిళలు రెండు టీ20లతో పాటు మూడు వన్డేలు ఆడాల్సి ఉంది.
