Dhoni IPL 2022: మహేంద్ర సింగ్ ధోనీ.. ప్రస్తుత ఐపీఎల్ సీజన్లో బ్యాటింగ్తో ఆకట్టుకుంటున్నాడు. తొలి మ్యాచ్లో కోల్కతాపై 50, లఖ్నవూతో ఆఖర్లో వచ్చి 6 బంతుల్లోనే 16 పరుగులతో రాణించాడు. రెండింట్లోనూ అవుట్ కాకపోవడం విశేషం. కానీ.. చెన్నైని మాత్రం గెలిపించలేకపోయాడు. ఆడిన రెండు మ్యాచ్ల్లోనూ జట్టు ఓడిపోయింది. సీజన్ ప్రారంభమయ్యే రెండు రోజుల ముందు చెన్నై కెప్టెన్సీ నుంచి ధోనీ తప్పుకోగా.. రవీంద్ర జడేజా కొత్త సారథిగా బాధ్యతలు నిర్వర్తిస్తున్నాడు.
తొలి గెలుపు కోసం చెన్నై.. ఆదివారం పంజాబ్తో తలపడనుంది. ముంబయి బ్రబౌర్న్ స్టేడియంలో రాత్రి 7.30 గంటలకు ప్రారంభం కానుంది. ఈ మ్యాచ్లో ధోనీని ఓ రికార్డు ఊరిస్తుంది. మరో 3 సిక్స్లు కొడితే.. టీ-20 క్రికెట్లోత చెన్నై ఫ్రాంఛైజీ తరఫున అత్యధిక సిక్సర్లు కొట్టిన జాబితాలో తొలి స్థానానికి చేరుకుంటాడు. ప్రస్తుతం ధోనీ 217 సిక్స్లతో ఉన్నాడు. ఇందులో 191 ఐపీఎల్లో చెన్నై తరఫున, మరో 26 ఛాంపియన్స్ లీగ్లో కొట్టాడు. రైనా 219 సిక్స్లతో చెన్నై తరఫున తొలి స్థానంలో ఉన్నాడు.
- మొత్తంగా చూస్తే ధోనీ టాప్-5లో ఉన్నాడు.
- విండీస్ దిగ్గజం క్రిస్ గేల్ 263 సిక్స్లతో(రాయల్ ఛాలెంజర్స్ బెంగళూరు తరఫున) టాప్లో ఉన్నాడు.
- కీరన్ పొలార్డ్ 249 సిక్స్లు(ముంబయి ఇండియన్స్), ఏబీ డివిలియర్స్ 240 సిక్సర్లు(రాయల్ ఛాలెంజర్స్ బెంగళూరు), విరాట్ కోహ్లీ 226 సిక్సర్లు(రాయల్ ఛాలెంజర్స్ బెంగళూరు) వరుసగా ఆ తర్వాతి స్థానాల్లో ఉన్నారు.
3 సిక్సర్లు బాదితే.. టీ20 క్రికెట్లో రాస్ టేలర్ను కూడా అధిగమించి అత్యధిక సిక్స్లు కొట్టిన బ్యాటర్ల జాబితాలో 27వ స్థానానికి చేరుకుంటాడు. ఇప్పటివరకు టీ20ల్లో ధోనీ 349 మ్యాచ్లు ఆడి.. 307 సిక్స్లు బాదాడు. మరో మ్యాచ్ ఆడితే.. 350 టీ20లు ఆడిన అరుదైన ఆటగాళ్ల లిస్ట్లోకి ప్రవేశిస్తాడు. టీమ్ఇండియా, ముంబయి ఇండియన్స్ కెప్టెన్ రోహిత్ శర్మ.. మొత్తం టీ20ల్లో 371 మ్యాచ్లు ఆడి లిస్ట్లో 11వ స్థానంలో ఉన్నాడు. ధోనీ 19వ స్థానానికి చేరుకుంటాడు. భారత్ నుంచి వీరిద్దరే ఈ జాబితాలో ఉండటం విశేషం.
ఇవీ చూడండి: ఫెంటాస్టిక్ ఫెర్గూసన్.. దిల్లీని ఓడించిన గుజరాత్
